Almaniyada inflyasiya İran müharibəsi səbəbindən bir ildən uzun müddətdə ən yüksək səviyyəyə çatıb. Bu, Avropa Mərkəzi Bankının (ECB) faiz dərəcələrini artırmaq məcburiyyətində qalacağı fikrini dəstəkləyir.

Almaniyada inflyasiya İran müharibəsinin enerji xərclərini artırması ilə mart ayında sürətlə yüksəlib.

Marja xəbər verir ki, Almaniya Statistika Ofisinin məlumatına görə, istehlak qiymətləri bir il əvvəlki dövrə nisbətən 2,8% artıb. Bloomberg-in proqnozları da 2,8% artım olacağını göstərirdi. Fevral ayında inflyasiya 2% idi. Bu, bir ildən uzun müddətdə görülən ən yüksək səviyyədir.

Aylıq artım proqnozlara uyğun olaraq 1,2% olub. Əvvəlki ay 0,4% artım qeydə alınmışdı.

Orta Şərqdəkı münaqişələrin beşinci həftəsinə daxil olunması ilə neft və təbii qaz qiymətlərindəki artım Avropadakı qiymətlərə də təsir göstərib.

Avropa Mərkəzi Bankı Prezidenti Christine Lagarde bildirib ki, lazım gəlsə qərarlı və sürətli addımlar atacaqlar, lakin rəsmilər mümkün nəticələrin hamısını nəzərdən keçirərkən tələsməyəcəklər. Valyuta bazarlarında isə il ərzində üç faiz artırımı olacağı gözlənilir.

İspaniyada da inflyasiya 3,3%-ə yüksəlib; lakin artım analitiklərin proqnozundan aşağı olub. Fransada və İtaliyada inflyasiya isə çərşənbə axşamı dərc olunacaq. Avrozonasında inflyasiyanın da 2,6% səviyyəsinə çatması, yəni 2024-cü ilin iyulundan bəri ən yüksək səviyyəyə çıxması gözlənilir.

Almaniyada enerji problemlərinə sürətli həll gözlənilmədiyinə dair əlamətlər var. Bu gün Ifo Institute tərəfindən dərc olunan sorğu bir çox şirkətin qiymətləri artırmağa hazırlaşdığını göstərir, Avropa Komissiyasının sorğusuna görə isə istehlakçıların inflyasiya gözləntiləri 2022-ci ildən bəri ən yüksək səviyyəyə çatıb.

Avropa Mərkəzi Bankı dörd il əvvəl Rusiyanın Ukraynanı işğalından sonra baş verən enerji şokuna çox gec reaksiya verdiyi üçün tənqid olunmuşdu. O zaman inflyasiya 10%-i aşmış və gec də olsa Avropa Mərkəzi Bankı inflyasiyanı aşağı salmaq üçün borclanma xərclərini (faizləri) aqressiv şəkildə artırmalı olmuşdu.

Hazırkı böhranın əsas səbəbi enerji qiymətlərinin artımı olsa da, rəsmilər vurğulayır ki, Avrozona daha az həssasdır, çünki tələbat daha zəifdir, əmək bazarı möhkəmdir və pul siyasəti tənzimləmələri daha neytraldır.