Dünən ABŞ Mərkəzi Bankı – Federal Reserve (FED) ilin ikinci pul siyasəti iclasında uçot dərəcəsi ilə bağlı qərarını açıqlayıb.

Marja xəbər verir ki, FED martın 17–18-də keçirilən iclasdan sonra əsas faiz dərəcəsini 3,50% – 3,75% aralığında sabit saxlayıb. Bloomberg tərəfindən sorğuda iştirak edən iqtisadçıların proqnozları da bu qərarın veriləcəyini göstərirdi.

FED sonuncu dəfə dekabrın 10-da faiz dərəcəsini 25 baza bəndi endirmişdi. Hazırda uçot dərəcəsi 2022-ci ilin sonundan bəri ən aşağı səviyyədə qalır.

“Yaxın Şərqdəki gərginliyin təsiri qeyri-müəyyəndir”

Fed-in açıqlamasında bildirilib ki, iqtisadi fəaliyyət sabit şəkildə davam edir, əmək bazarı güclü qalır və işsizlik səviyyəsi son aylarda əhəmiyyətli dəyişiklik göstərməyib. Bununla belə, inflyasiya hələ də hədəf səviyyədən yüksəkdir.

Yaxın Şərqdəki gərginliyin ABŞ iqtisadiyyatına təsiri ilə bağlı qeyri-müəyyənliyə diqqət çəkən FED, qiymət sabitliyi və tam məşğulluq hədəfləri üzrə riskləri yaxından izləməyə davam edəcəyini vurğulayıb.

Mərkəzi bank gələcək faiz qərarlarında iqtisadi göstəriciləri, proqnozlardakı dəyişiklikləri və risk balansını diqqətlə qiymətləndirəcəyini bildirib.

İdarə heyətində 11 üzv faizin sabit saxlanmasına səs verib. Yeganə fərqli mövqe isə Stephen Miran tərəfindən irəli sürülüb. O, faizlərin 25 baza bəndi azaldılaraq 3,25–3,50% aralığına endirilməsini təklif edib.

Powell-dan açıqlamalar

Fed sədri Jerome Powell qərardan sonra keçirdiyi mətbuat konfransında iqtisadi vəziyyətə dair fikirlərini bölüşüb.

Powell bildirib ki, inflyasiya hələ də yüksək səviyyədə qalır və bu sahədə konkret irəliləyiş əldə olunmadan faiz endirimi gündəmdə deyil. O, qısamüddətli inflyasiya gözləntilərinin son dövrlərdə artdığını və bunun əsasən neft qiymətlərindəki ciddi yüksəlişlə bağlı olduğunu qeyd edib.

Enerji qiymətlərinin yüksək qalmasının inflyasiyanı artıracağını bildirən Powell, neft şokunun bir hissəsinin əsas (baza) inflyasiyaya da təsir edəcəyini vurğulayıb. O əlavə edib ki, xüsusilə mal inflyasiyasının dinamikası diqqətlə izlənilir.

Əmək bazarına toxunan Powell qeyd edib ki, işsizlik səviyyəsi ötən yaydan bəri ciddi dəyişməyib. İstehlak xərcləri güclü qalır və iqtisadi artım müsbət dinamika nümayiş etdirir. Uzunmüddətli inflyasiya gözləntilərinin isə əsasən 2%-lik hədəflə uyğun olduğu bildirilib.

Powell həmçinin vurğulayıb ki, Yaxın Şərqdəki gərginliyin iqtisadi təsirlərini tam qiymətləndirmək üçün hələ tezdir və mövcud faiz dərəcələri sərt və qeyri-sərt siyasət sərhədinin bir qədər üzərində yerləşir.

İş elanları AzVak.az-da