“Nort Vest Konstrakşn” MMC 2024-cü ili 34 milyon 607 min manat xalis mənfəət ilə başa vurub. Şirkət 2023-cü ili 32 milyon 729 min manat xalis mənfəət ilə bağlamışdı. Beləliklə, “Nort Vest Konstrakşn” şirkətinin xalis mənfəəti 2024-cü ildə 2023-cü illə müqayisədə 1 milyon 878 min manat və ya 5,7% artıb.

Marja.az “Nort Vest Konstrakşn” MMC-nin 31 dekabr 2024-cü il üçün maliyyə vəziyyəti haqqında hesabatına istinadən xəbər verir ki, 2023-cü ildə şirkətin əsas əməliyyat gəlirləri 415 milyon 988 min manat ikən, 2024-cü ildə 406 milyon 597 min manata düşüb (9 milyon 391 min manat azalıb). Şirkətin müqavilə xərcləri və satışın maya dəyəri isə 15 milyon 540 min manat azalaraq 347 milyon 238 min manata geriləyib. Satışın maya dəyərində azalma məbləğinin əməliyyat gəlirlərindəki azalma məbləğindən daha çox olması xalis mənfəətin artmasına səbəb olub. 

Qeyd edək ki, "Nort Vest Konstrakşn" (North West Costruction) şirkətinin fəaliyyəti sənaye obyektlərinin, çoxfunksiyalı bina və komplekslərin, yolların, körpülərin, tunellərin və digər nəqliyyat infrastruktur sistemlərinin, su təchizatı və kanalizasiya sistemlərinin, enerji layihələrinin tikintisi və layihələndirilməsini əhatə edir. "Nort Vest Konstrakşn" həmçinin layihənin idarə edilməsi xidmətlərini göstərir.

İş elanları AzVak.az-da

"Nort Vest Konstrakşn"şirkətinin portfelində yer alan görkəmli layihələrə misal olaraq: Mərkəzi Asiya Regional İqtisadi Əməkdaşlıq (CAREC) dəhlizi 2 Qaraqalpaqstan yolu layihəsi (A380 Kunqraddan Daut-Ata bölməsinə - 240 km); Gədəbəy, Tərtər və Qazax şəhərlərində ÇSTQ-ın tikintisi; Tovuz yol inşaatı; Tovuz Suvarma və Su Paylama Sistemləri boru kəməri; “Gəncə Mall” ticarət mərkəzi; Bravo hipermarketlər və Bravo paylama anbarı; Sumqayıt Tütün Fabriki kimi layihələri göstərmək olar. NW həmçinin Port Baku Towers; Port Baku Residence; Bakı Ağ Şəhər – “Knights Bridge” yaşayış kompleksi; Ritz-Carlton Hotel; One & Only Resort Portonovi – Monteneqro; “Cənubi Əl Mutlala” mənzil layihəsi – Küveyt; Baku Boulevard Hotel; Baku Intourist Hotel; “Pik Palace Şahdağ Hotel” layihələrində iştirak etmişdir.