“AS Group”un törəmə şirkəti olan “AS İnşaat” MMC tərəfindən inşa edilmiş “Ağıllı kənd” layihəsi olan Zəngilan rayonunun Ağalı kəndi Avropanın ən böyük çoxdilli beynəlxalq xəbər media qurumlarından biri olan “Euronews” tərəfindən işıqlandırılan yaşayış məntəqələrindən biri olub.

“Euronews” “Smart urban recovery transforms Karabakh and East Zangazur” (“Ağıllı yenidənqurma Qarabağ və Şərqi Zəngəzuru transformasiya edir”) başlıqlı videoçarx hazırlayaraq regionda həyata keçirilən post-münaqişə bərpa prosesini beynəlxalq auditoriyaya təqdim edib. Videoçarx Dünya Şəhərsalma Forumu 2026 (WUF13) əməkdaşlığı çərçivəsində hazırlanıb.

Hazırlanan material “Euronews” tərəfindən rəsmi xəbər formatında həm Euronews.com saytında, həm də media qurumunun müxtəlif dillərdəki platformalarında yayımlanıb. Daha sonra video məzmun “YouTube” və “Dailymotion” kimi beynəlxalq rəqəmsal platformalarda paylaşılaraq geniş izləyici auditoriyasına çatdırılıb.

Videoçarxda Qarabağ və Şərqi Zəngəzurun bərpa prosesinin ənənəvi tikinti modelindən kənara çıxaraq müasir və ağıllı şəhərsalma strategiyaları əsasında həyata keçirildiyi vurğulanıb. Bildirilib ki, bölgədə reallaşdırılan layihələr sadəcə fiziki yenidənqurma ilə məhdudlaşmır, eyni zamanda ağıllı kənd və yaşayış məntəqələrinin yaradılması, dayanıqlı mənzil konsepsiyasının tətbiqi,enerji səmərəliliyi və rəqəmsal xidmətlərin inteqrasiyası, tarixi və mədəni irsin qorunmasıkimi çoxşaxəli komponentləri özündə birləşdirir.

“Euronews” süjetində bir sıra yaşayış məntəqələri ilə yanaşı, Ağalı kəndi də ağıllı kənd modelinin praktik nümunələrindən biri kimi təqdim olunub. Videomaterialda bərpa olunan enerji sistemləri, dayanıqlı şəhərsalma planlaşdırması, innovativ memarlıq həlləri və müasir sosial infrastruktur elementləri xüsusi diqqətə çatdırılıb.

Eyni zamanda vurğulanıb ki, bu yanaşma yalnız yaşayış şəraitinin yaxşılaşdırılmasına xidmət etmir, həm də kənd təsərrüfatı və yerli iqtisadi fəaliyyət üçün yeni imkanlar yaradır, regionun sosial strukturunu daha rəqəmsal, adaptiv və dayanıqlı formaya gətirir.

Qeyd edək ki, Ağalı kəndi “AS İnşaat” MMC tərəfindən cəmi 11 ay kimi qısa müddət ərzində inşa olunub və Qarabağda tətbiq edilən ağıllı kənd konsepsiyasının ilk real nümunələrindən biri hesab edilir.

Videoçarxı izləyə bilərsiniz: