“”PAŞA Bank” kapitalının 5 faizini səhmlərin ilkin kütləvi təklifi – IPO formatında bazara təqdim edəcəkdir. Burada məsələ sadəcə səhmlərin listinqə çıxarılması deyil. Əsas məsələ ondan ibarətdir ki, bu fürsətdən siz də yararlana bilərsiniz”.

Marja xəbər verir ki, bunu "PAŞA Bank" səhmlərinin İlkin Kütləvi Təklifinə (İPO) dair tədbirdə Bankın İdarə Heyətinin üzvü, Baş maliyyə inzibatçısı Murad Süleymanov bildirib.

Murad Süleymanov, “İlk növbədə qeyd etmək istəyirəm ki, bu emissiya zərurətdən irəli gəlmir” deyərək çıxışına belə davam edib: 

“Bank yüksək kapitallaşmaya, güclü maliyyə mövqeyinə və davamlı maliyyə nəticələrinə malikdir. IPO qərarı investor bazasının genişləndirilməsi və şaxələndirilməsi istiqamətində düşünülmüş strateji addımdır. Məqsədimiz müxtəlif iqtisadi dövrlərdə dayanıqlığını sübut etmiş maliyyə institutuna uzunmüddətli tərəfdaşların cəlb edilməsidir.

Bu addım eyni zamanda kapital bazarlarının inkişafına töhfə vermək məsuliyyətinin bir hissəsidir. Bundan əlavə, "PAŞA Bank" ın institusional yetkinlik və korporativ idarəetmə baxımından növbəti mərhələyə keçmək niyyətini əks etdirir.

"PAŞA Bank" uzun illərdir fəaliyyətini konservativ risk idarəetməsi, intizamlı artım və sabit mənfəətlilik prinsipləri əsasında qurmuşdur. Kapitalın gəlirliliyi, aktivlərin keyfiyyəti və möhkəm kapital göstəriciləri bu qərarın reallaşdırılmasına imkan vermişdir. Volatillik dövrlərində tətbiq etdiyimiz ehtiyatlı investisiya siyasəti bankın dayanıqlı maliyyə strukturunu və bazar şoklarına qarşı dözümlülüyünü nümayiş etdirmişdir.

Bu gün Azərbaycan bank sektoruna nəzər saldıqda görürük ki, əvvəlki dövrlərlə müqayisədə struktur baxımından daha güclüdür. Sektor daha yüksək kapitallaşmaya, möhkəm tənzimləmə çərçivəsinə və yüksək şəffaflığa malikdir.

Məqsədimiz dəyişməzdir: davamlı gəlirlik, ölçülmüş artım və sabit dividend potensialı. Biz intizamlı və uzunmüddətli dəyər yaradan model təqdim edirik".

Həmçinin oxu

Cavid Quliyev/ “PAŞA Bank”: “İPO ilə illər ərzində yaratdığımız dəyəri geniş investor kütləsi ilə bölüşmək istəyirik”