Azərbaycanda hotel sənayesində qiymətlərin süni şəkildə aşağı salınması bazarda qeyri-sağlam rəqabət mühiti yaradır.

Bu barədə Azərbaycanda Amerika Ticarət Palatasının ("AmCham") "Ağ sənəd 2025" adlı hesabatında qeyd olunub.

Bildirilib ki, bəzi hallarda hotellər müştəri cəlb etmək üçün çox aşağı tariflər tətbiq edir ki, bu da gəlirliliyin azalmasına və xidmət standartlarının zəifləməsinə gətirib çıxarır. Nəticədə sektorun ümumi inkişafı və dayanıqlılığı risk altına düşür.

Bu səbəbdən orta gündəlik tarif üzrə minimum qiymət həddinin tətbiqi tövsiyə olunur. Hesab edilir ki, bu mexanizm xidmət keyfiyyətinin qorunmasına, ədalətli rəqabətin təmin edilməsinə və qonaq məmnuniyyətinin artmasına müsbət təsir göstərəcək.

Hotellər üçün əmlak vergisinin azaldılması təklif edilir

Azərbaycanda hotel sektorunda yüksək əmlak vergilərinin biznesin inkişafını ləngitdiyi və investisiya imkanlarını məhdudlaşdırdığı bildirilir.

Bu barədə Azərbaycanda Amerika Ticarət Palatasının ("AmCham") "Ağ sənəd 2025" adlı hesabatında qeyd edilib.

Sənəddə vurğulanır ki, mövcud vergi yükü hotel sahiblərinin infrastrukturun yenilənməsi, xidmət keyfiyyətinin yüksəldilməsi və personalın hazırlanması kimi əsas istiqamətlərə əlavə vəsait yönəltməsini çətinləşdirir: "Nəticədə bu amil Azərbaycanın turizm sektorunun beynəlxalq bazarda rəqabət qabiliyyətinə mənfi təsir göstərir".

Hesabatda hotellər üçün əmlak vergisinin azaldılması, eləcə də yeni tikilən və ya əsaslı təmir olunan obyektlərə vergi güzəştlərinin tətbiqi tövsiyə olunur.

Qeyd olunur ki, bu addımlar investisiya mühitinin yaxşılaşmasına, hotel biznesinin gəlirliliyinin artmasına və xidmət standartlarının yüksəldilməsinə şərait yarada bilər.

Hotellər üçün avadanlıqların idxalında gömrük rüsumları ləğv edilməlidir

AmCham: Hotellər üçün avadanlıqların idxalında gömrük rüsumları ləğv edilməlidir

Azərbaycanda hotellərin maddi-texniki bazasının yenilənməsi və beynəlxalq standartlara uyğunlaşdırılması məqsədilə əməliyyat təchizatları, mebel və interyer avadanlıqlarının idxalında gömrük rüsumlarının ləğvi təklif olunur.

Sənəddə bildirilir ki, hazırda OS&E (əməliyyat təchizatları və avadanlıqları) və FF&E (mebel, interyer və avadanlıqlar) kateqoriyasına aid malların idxalı zamanı tətbiq edilən gömrük rüsumları hotel sahibləri üçün əlavə maliyyə yükü yaradır və modernləşmə prosesini ləngidir. Bu xərclər son nəticədə həm xidmət keyfiyyətinə, həm də qonaq təcrübəsinə mənfi təsir göstərir.

Hesabatda vurğulanır ki, sözügedən rüsumların ləğvi hotel sektorunun inkişafını sürətləndirə, investisiya mühitini yaxşılaşdıra və beynəlxalq investorların Azərbaycanın turizm bazarına marağını artıra bilər.

İş elanları AzVak.az-da

© "Report"