Azərbaycanın ən böyük vençur kapital fondu olan SABAH.fund ABŞ-da Gürcüstan mərkəzli komanda tərəfindən təsis edilmiş “Helio AI” startapının 1 milyon ABŞ dolları dəyərində toxum investisiya raundunu uğurla başa çatdırdığını açıqlayıb.

Marja xəbər verir ki, Raunda SABAH.fund rəhbərlik edib və proses beynəlxalq vençur kapital fondlarının iştirakı ilə tamamlanıb.

İnvestisiya raundunda “Tetrad VC”, “Axiom”, “DOMiNO Ventures” kimi tanınmış beynəlxalq fondlar, həmçinin mələk investor Bas Godska iştirak ediblər.

Yeni investisiya “Helio AI”ın süni intellekt əsaslı işə qəbul agentinin qlobal miqyasda genişləndirilməsi, məhsulun texnoloji imkanlarının artırılması və sürətlə böyüyən bazarlarda işəgötürmə proseslərinin modernləşdirilməsi üçün istifadə olunacaq.

Süni intellekt texnologiyalarını oyun əsaslı testlərlə birləşdirən “Helio AI” şirkətlərə ən uyğun namizədlərin qısa müddətdə müəyyənləşdirilməsinə, işə qəbul prosesinin isə 70 faizədək avtomatlaşdırılmasına imkan yaradır. Platforma yerli dillərdə danışa və müraciətləri emal edə bilən intellektual agent kimi fəaliyyət göstərir. Hazırda startapın həllindən 7 ölkədə yüzlərlə şirkət istifadə edir.

“İrimiqyaslı iş qurarkən sinerji çox önəmlidir və buna görə də tərəfdaşlarımızı diqqətlə seçirik. Bu raund “Helio AI”-ın xarici bazarlara çıxışını genişləndirmək və mövcud bazarlardakı təsirimizi artırmaq üçün mühüm mərhələdir,” – deyə “Helio AI”-ın həmtəsisçisi və baş icraçı direktoru İako Jikia bildirib.

Raundun aparıcı investoru SABAH.fund-un həmtəsisçisi və idarəedici partnyoru Abbas Kazmi qeyd edib:

“Helio AI”-ın investisiya raunduna rəhbərlik etməkdən məmnunuq. Şirkətin gələcəyə baxışı SABAH.fund-un missiyası ilə uyğunluq təşkil edir və biz genişmiqyaslı, sistemli problemlərin həllinə yönəlmiş təsisçilərin inkişafını dəstəkləyirik. HR texnologiyaları demək olar ki, bütün təşkilatları əhatə etsə də, bu sahə hələ də qabaqcıl süni intellekt həlləri ilə tam şəkildə təmin olunmayıb. “Helio AI” bu boşluğu aradan qaldırır və biz onların işə qəbul proseslərinin gələcəyini formalaşdıracaq potensiala malik peşəkar komandaya sahib olduqlarına inanırıq.”

“Helio AI” bundan əvvəl Gürcüstandan mələk investorlar, “Axel” (Gürcüstan Biznes Mələk Şəbəkəsi) və “500 Eurasia” fondundan ümumilikdə 350 min ABŞ dolları investisiya cəlb edib. Startap bu il “Baku ID” 2025 innovasiya festivalı çərçivəsində keçirilən “Nexus Awards” mükafatlandırma mərasimində “İnsan resursları texnologiyaları üzrə" ən yaxşı startap seçilib.

Qeyd edək ki, SABAH.fund 2024-cü ildə SABAH.HUB İnnovasiya Mərkəzinin çətiri altında, yerli və qlobal bazarlarda miqyaslana bilən problem və ehtiyacları həll edən startap təsisçilərini dəstəkləmək məqsədilə təsis edilib. Fond həm regionun ən böyük vençur kapital fondu, həm də Mərkəzi Asiya, Türkiyə, Yaxın Şərq və Şimali Afrika regionlarına investisiya yatıran ilk vençur kapitalı qurumudur