Çin Xalq Respublikasının Sian şəhərinin meri Ye Niu Pinin başçılıq etdiyi nümayəndə heyəti Abşeron Logistika Mərkəzində işgüzar səfərdə olublar.

Səfər çərçivəsində qonaqlar Abşeron Logistika Mərkəzinin layihəsi olan “Biznes Park Abşeron” ilə tanış olublar.

Görüş zamanı tərəflər Azərbaycan-Çin arasında iqtisadi əməkdaşlığının genişləndirilməsi, logistika və ticarət sahəsində mövcud imkanlar, eləcə də qarşılıqlı investisiya perspektivləri barədə fikir mübadiləsi aparıblar.

Qonaqlara Biznes Parkın infrastruktur potensialı, logistika imkanları və müasir texnoloji həllərlə təchiz olunmuş ərazilər barədə ətraflı məlumat verilib. Layihə sahibkarlar üçün innovativ və funksional biznes mühitinin formalaşdırılmasını, həmçinin yerli və beynəlxalq investorların cəlb edilməsi üçün strateji imkanların yaradılmasını nəzərdə tutur.

Görüş çərçivəsində Abşeron Logistika Mərkəzi və Çinin Sian Limanı arasında Anlaşma Memorandumu imzalanıb. Abşeron Logistika Mərkəzinin İdarə Heyətinin sədri Ziya Ağayev və “Xi’an International Port Group”un baş direktoru Yuan Syaodzyunun imzaladığı sənəddə iki tərəf arasında hərtərəfli əməkdaşlıq əlaqələrinin qurulmasını və möhkəmləndirilməsini, sahibkarlıq sahəsində təcrübə və informasiya mübadiləsinin təşviqini, həmçinin uzunmüddətli və etibarlı tərəfdaşlıq üçün dayanıqlı şəraitin yaradılmasını nəzərdə tutur.

Sənədin imzalanmasından sonra nümayəndə heyəti layihənin infrastruktur imkanları ilə əyani şəkildə tanış olublar.

Sian şəhərinin meri Ye Niu Pin “Biznes Park Abşeron” layihəsinin strateji əhəmiyyətini, sahibkarlar üçün yaradılan innovativ biznes mühitini və regionda Azərbaycan-Çin əməkdaşlığının genişləndirilməsinə töhfə verən imkanları yüksək qiymətləndirib.

Qeyd edək ki, “Biznes Park Abşeron” layihəsi Abşeron Logistika Mərkəzinin təşəbbüsü ilə həyata keçirilir və müasir biznes mühiti, anbar kompleksləri, logistika xidmətləri, eləcə də innovativ texnoloji həllərlə regionun investisiya cəlbediciliyinin artırılmasına töhfə verir.

Həmçinin oxu

Abşeron Logistika Mərkəzi və Sian Limanı arasında Anlaşma Memorandumu imzalandı