Çinin qərbində yerləşən Çendu (Chengdu) şəhərində baş verən dəhşətli qəza Xiaomi SU7 Ultra modelinin təhlükəsizliyini yenidən gündəmə gətirib.

Marja xəbər verir ki, hadisə səhər saatlarında Tianfu prospektində baş verib. Yüksək sürətlə hərəkət edən avtomobil hərəkət zolaqlarını ayıran divara çırpıldıqdan sonra alovlanıb.

Avtomobili qısa zamanda alova bürünüb

Sosial mediada yayılan görüntülərdə avtomobilin bir neçə saniyə ərzində tamamilə alovlara qərq olduğu görünür. Hadisə şahidlərinin sözlərinə görə, ətrafdakı sürücülər köməyə qaçsalar da, qapıların açılmaması səbəbindən sürücüyə yaxınlaşmaq mümkün olmayıb.

Şüşələr qırılmayıb, qapılar açılmayıb

Şahidlər bildiriblər ki, hadisə zamanı insanlar dirsəkləri və ayaqqabıları ilə avtomobilin yan şüşələrini sındırmağa çalışıblar, lakin buna nail ola bilməyiblər. Bəzi şəxslər yanğınsöndürən balonlarla müdaxilə etməyə cəhd etsələr də, alovun yüksək istiliyi və sürətlə yayılması səbəbindən xilasetmə mümkün olmayıb.

“Qapı kilidi” mübahisəsi 

Qəzanın ardından Çin sosial mediasında “qapı kilidi problemi” müzakirələrə səbəb olub. İstifadəçilər iddia ediblər ki, Xiaomi SU7 Ultra modelində toqquşmadan sonra avtomatik kilidlənmə sistemi qapıların açılmasına mane olub. Lakin bu iddialarla bağlı rəsmi təsdiq və ya təkzib hələlik verilməyib.

Xiaomi və yerli hakimiyyətdən açıqlama yoxdur

Hadisə ilə bağlı nə Xiaomi Auto, nə də Çendunun yerli hakimiyyəti rəsmi açıqlama yayıb. Qəzanın dəqiq səbəbi və avtomobilin təhlükəsizlik sistemində texniki nasazlıq olub-olmadığı aparılan araşdırmalardan sonra müəyyən ediləcək.

Səhmlər 9%-ə yaxın ucuzlaşıb

Qəza xəbəri və sosial mediada yayılan videolar Xiaomi şirkətinin bazar dəyərinə də təsir göstərib. Bazar ertəsi günü Xiaomi səhmləri 8,7%-ə qədər ucuzlaşaraq aprel ayından bəri ən aşağı səviyyəyə düşüb. Analitiklər bildirirlər ki, bu ucuzlaşma birbaşa ölümlə nəticələnən qəzanın ictimai rezonansı və brendin təhlükəsizlik reputasiyasına zərbə ilə əlaqədardır.

Hazırda hadisə ilə bağlı Çin nəqliyyat və təhlükəsizlik orqanları araşdırma aparır.

İş elanları AzVak.az-da