Asiya İnfrastruktur İnvestisiya Bankı (AIIB) Azərbaycan üzrə uzunmüddətli investisiya proqramı hazırlayacaq.

Marja.az Banka istinadən xəbər verir ki, bunu AIIB-in prezidenti və Direktorlar Şurasının sədri Cin Liqun Azərbaycanla tərəfdaşlığın genişləndirilməsi haqqında birgə bəyannamənin imzalanması zamanı bildirib.

Bankın yaydığı məlumatda bildirilib ki, davamlı inkişafı və regional əməkdaşlığı sürətləndirmək istiqamətində mühüm addım olaraq Asiya İnfrastruktur İnvestisiya Bankı (AIIB) və Azərbaycan Respublikası tərəfdaşlıqlarını yüksəltmək üçün birgə bəyannamə imzalayıblar.

"Azərbaycanın iqtisadiyyat naziri Mikayıl Cabbarov və AIIB-in II Region üzrə Baş İnvestisiya Direktoru Konstantin Limitovskiy, Azərbaycan Respublikasının Prezidenti cənab İlham Əliyev və AIIB-in Prezidenti və Direktorlar Şurasının sədri Cin Liçunun iştirakı ilə keçirilən mərasimdə Strateji Əməkdaşlıq üzrə Birgə Bəyannaməni imzalayıblar.

Birgə Bəyannamə Azərbaycanın “2030-cu il üçün sosial-iqtisadi inkişaf üzrə milli prioritetləri” ilə, həmçinin AIIB-in “Sabahın İnfrastrukturunu” maliyyələşdirmək missiyası ilə üst-üstə düşür. Genişləndirilmiş əməkdaşlıq AIIB-in dövlət zəmanətli maliyyələşdirməsi üçün dinamik, çoxillik investisiya proqramının yaradılmasına yönəlib. Proqram üç əsas istiqaməti əhatə edəcək: dekarbonizasiyanı dəstəkləyən və milli iqlim hədəflərinə xidmət edən müasir, iqlimədavamlı infrastrukturun maliyyələşdirilməsi; Azərbaycanın beynəlxalq ticarət və logistika dəhlizi rolunu möhkəmləndirmək üçün yeni nəslin nəqliyyat, enerji və rəqəmsal infrastrukturunun inkişafı; və innovativ maliyyə modelləri yaratmaqla, eləcə də dövlət-özəl tərəfdaşlıqlar üçün əlverişli mühit formalaşdırmaqla özəl sektor investisiyalarını stimullaşdırmaq. Ümumi əsas məqsəd isə iqlim dəyişiklikləri ilə mübarizə aparmaq və qlobal iqlim hədəflərinə töhfə verməkdir", - məlumatda deyilir.

Azərbaycan Respublikasının Prezidenti cənab İlham Əliyev bildirib:

“Biz Azərbaycan və AIIB arasında mövcud münasibətlərin səviyyəsindən və uğurlu əməkdaşlıqdan məmnunuq. Dəmir yolu, avtomobil yolları, limanlar, metro, su idarəçiliyi və kanalizasiya, bərpa olunan enerji, rəqəmsallaşma və digər sahələrdə daha çox əməkdaşlıq imkanları görürük. Bu Birgə Bəyannamə əməkdaşlığımızı yeni mərhələyə daşımaq üçün yaxşı bir mexanizmdir. Biz bu gücləndirilmiş tərəfdaşlığı alqışlayırıq.”

AIIB-in Prezidenti və Direktorlar Şurasının sədri Cin Liçu isə belə deyib:

“Azərbaycan, AIIB-in təsisçi üzvü olaraq, başlanğıcdan etibarlı tərəfdaş olub. AIIB ölkənin inkişafına daha çox dəstək verməyə sadiqdir və onun əhəmiyyətli artım potensialına inanır. Birgə Bəyannamə, qarşılıqlı niyyətimizi əks etdirərək, uzunmüddətli investisiya proqramı vasitəsilə əlaqələndirilmiş gələcək qurmaq məqsədini daşıyır. AIIB Azərbaycanın milli prioritetlərini dəstəkləmək və dayanıqlı inkişaf və ortaq rifaha xidmət edən infrastrukturun inkişafını irəlilətmək üçün Azərbaycanla əməkdaşlıq etməyi səbirsizliklə gözləyir.”

AIIB 2016-cı ildə fəaliyyətə başlayıb. Hazırda onun 110 təsdiq edilmiş üzvü və 100 milyard ABŞ dolları məbləğində nizamnamə kapitalı var.