Azərbaycan Qazaxıstanın cənub-şərq hissəsində, müalicəvi xüsusiyyətləri və füsunkar təbiəti ilə tanınan Alakol gölünün sahilində beynəlxalq müalicə-sağlamlıq kompleksi inşa edəcək.

Qazaxıstan KİV-nin verdiyi məlumata görə, bu məsələni Qazaxıstanın Azərbaycandakı səfiri Alim Bayel Abay vilayətinin akimi Berik Uali ilə müzakirə edib.

İkitərəfli görüşdə, həmçinin Azərbaycan-Qazaxıstan İşgüzar Şurasının sədr müavini, Türk Sahibkarlar Assosiasiyasının İdarə Heyətinin sədri Aslan Kuniyarov, Azərbaycan İnvestisiya Holdinqinin və İqtisadiyyat Nazirliyi yanında Azərbaycan Biznesinin İnkişafı Fondunun nümayəndələri iştirak ediblər.

Azərbaycan nümayəndə heyəti Alakol sahilində beynəlxalq müalicə-sağlamlıq kompleksinin tikintisi üzrə investisiya layihəsini təqdim edib. İnvestorlar eyni vaxtda 800 nəfəri qəbul etmək üçün nəzərdə tutulmuş ilboyunca fəaliyyət göstərəcək turizm obyekti tikməyi planlaşdırırlar. Layihəyə investisiya dəyəri 20 milyon ABŞ dolları təşkil edir. Kompleksin istifadəyə verilməsi ilə təxminən 200 yeni iş yeri yaradılacaq.

Bundan əlavə, layihə regionun turizm baxımından cəlbediciliyini artırmağa, yerli büdcəyə vergi daxilolmalarını artırmağa, tibb və istirahətin kəsişməsində yeni klaster formalaşdırmağa imkan verəcək.

A.Bayel görüşdə qeyd edib ki, Azərbaycan və Qazaxıstan arasında münasibətlər müttəfiqliyin yeni səviyyəsinə yüksəlib. Səfir Qazaxıstan rəhbərliyinin qarşıya bir sıra vəzifələr qoyduğunu xatırladıb. Buraya iqtisadi əlaqələrin gücləndirilməsi və turizm sahəsi də daxil olmaqla birgə layihələrin həyata keçirilməsi daxildir.

"2024-cü ildə biz Qazaxıstan və Azərbaycanın birgə investisiya fondunu yaratdıq. Əgər Alakoldakı layihə həyata keçirilsə, o, bu fond çərçivəsində ilk layihələrdən biri ola bilər", - diplomat vurğulayıb.

Vilayət akimi turizm layihəsinin region üçün əhəmiyyətini də vurğulayıb: "Qazaxıstan və Azərbaycan qardaş xalqlardır. Bizi ortaq tarix və mənəvi köklər birləşdirir. Sizin səfərinizə və məhz bizim vilayətimizdə böyük turizm kompleksinin inşası təşəbbüsünüzə şadıq. Hazırda Alakol turizm zonasının Baş planı hazırlanır. Biz tikinti üçün sahə ayırmağa hazırıq. Hökumət lazımi dəstəyi göstərəcək".

© “Report”un