22 iyul 2025-ci il tarixində Bakı Fond Birjasının (BFB) Listinq Komitəsinin qərarı ilə faktorinq xidmətləri göstərən “Ferrum Capital” QSC-nin 1 milyon manatlıq istiqrazlarının ticarətə buraxılması üçün “Ticarətə İcazə” qərarı verilib.

Marja.az xəbər verir ki, bu barədə Birja məlumat yayıb.

Qeyd edilib ki, istiqrazların sayı 10 min ədəd, ilkin ticarət qiyməti 100 AZN, illik gəlirlilik dərəcəsi 14%, tədavül müddəti 1 ildir. 

İstiqrazlar üzrə ətraflı məlumat aşağıdakı kimidir:

Emitentin adı: “Ferrum Capital”  QSC

Dövlət qeydiyyat nömrəsi – İSİN: AZ2019022287

İstiqrazın növü və forması: İstiqraz faizli, təmin edilməmiş sənədsiz adlı

Ticarət üsulu / forması: Kütləvi / Birqiymətli Hərrac

İstiqrazların sayı: 10 000 (ədəd)

İlkin ticarət qiyməti: 100 AZN

İstiqrazların buraxılış həcmi: 1 000 000 AZN

İllik gəlirlilik faizi: 14%

Ödəmə periodu: Buraxılışda olan ilk istiqrazın yerləşdirildiyi tarixdən etibarən 90 gündən bir

Tədavül müddəti: 12 ay

Ticarətə buraxılma tarixi: Emitent tərəfindən bildiriləcək

Anderrayter:  “UniCapital İnvestisiya Şirkəti” ASC

Qeyd edək ki, 2017-ci ildən fəaliyyət göstərən “Ferrum Capital” faktorinq şirkətidir. Faktorinq daxili və xarici ticarət proseslərində tətbiq olunan, xüsusən qısa müddətli maliyyə etiyaclarını qarşılamaq üçün istifadə olunan bir kredit alətidir. Faktorinq xidmətinə müraciət edən tərəf Müştəri və ya Satıcı, ödənişləri ödəyən tərəf Borclu və ya Alıcı, faktorinq xidmətini təqdim edən tərəf isə Faktor adlandırılır.

Bildiyiniz kimi, satıcı və alıcının ticarətdə müəyyən gözləntiləri vardır. Satıcının məqsədi məhsulu sürətli və nağd şəkildə satmaqdır. Alıcının əsas məqsədi isə keyfiyyətli məhsul əldə etmək, ödənişini isə hissə-hissə ödəməkdir.  Başqa bir sözlə, alıcının əsas məqsədi alınan malı satıb pula çevirdikdən sonra satıcının ödənişini etməkdir. Alıcı məhsulu alıb ödənişi daha sonra ödəmək istəyərsə və satıcı bu məhsulun pulunu İstehsalçıya dərhal ödəməli olarsa, hər iki tərəfin gözləntisini qarşılaya biləcək tək bir sistem var ki, o da Faktorinqdir. Məhsul satışı həyata keçdikdən sonra satıcının pulunu “Tələb etmə hüququ”, alıcının isə ödənişini “Ödəmə öhdəliyi” yaranır. Satıcının yaranmış bu tələbini faktorinq şirkətinə ötürməsinə və ya güzəştinə Faktorinq deyilir.