Avropa Yenidənqurma və İnkişaf Bankı (AYİB) 2024-cü ildə Azərbaycanda 8 layihəyə 196 milyon avro vəsait ayırıb.

Marja.az xəbər verir ki, bu barədə AYİB-in yaydığı məlumatda bildirilir.

Qeyd edilib ki, bu investisiyaların əksəriyyəti özəl sektorda olmaqla, 82 faizi ölkənin yaşıl iqtisadiyyatına, enerji və nəqliyyata, maliyyə institutları, kiçik və orta müəssisələr (KOB) də daxil olmaqla müxtəlif sektorlara yönəldilib.

2024-cü il ərzində AYİB ölkənin karbonsuzlaşdırma ambisiyalarını dəstəkləyən əsas tərəfdaşlardan biri olub. Bakıda keçirilən Birləşmiş Millətlər Təşkilatının İqlim Dəyişikliyi Konfransı zamanı (COP29) Bank Qafqazda ən böyük kommunal miqyaslı günəş elektrik stansiyalarının tikintisini birgə maliyyələşdirib və hazırda Azərbaycanda maliyyələşdirilən bərpa olunan enerjinin həcmi 1,2 giqavattı ötüb.

AYİB Azərbaycana ilk dəfə bərpa olunan enerji auksionunun keçirilməsində dəstək göstərib və nəticə COP29-da elan edilib. Nəticədə, Azərbaycanın enerji bazarının yeni iştirakçısı indi Azərbaycanın Qaradağ rayonunda 100 meqavatlıq (MVt) günəş elektrik stansiyasının istismara verilməsi istiqamətində işə başlayacaq.

Bank, həmçinin Azərbaycanın ticarət donanmasının fəaliyyətinin genişləndirilməsi üçün Azərbaycan Xəzər Dəniz Gəmiçiliyinə (ASCO) 42 milyon ABŞ dolları (38,71 milyon avro) kredit ayıraraq ölkənin nəqliyyat potensialına investisiya yatırıb.

2024-cü ildə AYİB ən böyük yerli maliyyə institutu olan Azərbaycan Beynəlxalq Bankı ilə əməkdaşlıq edərək, ticarətin maliyyələşdirilməsi limitini 50 milyon ABŞ dollarına (46,7 milyon avro) qədər təsdiqləyib. Bu mexanizm AYİB-in Ticarətin Asanlaşdırılması Proqramı (TFP) vasitəsilə Azərbaycan şirkətlərinin ixrac və idxal əməliyyatlarını dəstəkləmək, onların qlobal bazarlara inteqrasiyasına kömək etmək məqsədi daşıyır.

Azərbaycanda fəaliyyət göstərən KOB-lar da AYİB-in aktiv fəaliyyətinin əhəmiyyətli benefisiarları olub. İl ərzində və Avropa İttifaqının donor dəstəyi ilə Bank yerli bizneslərə kredit üçün AccessBank və Bank Respublikaya böyük məbləğdə kredit verib. AYİB, həmçinin AccessBank ilə imzaladığı 15 milyon avro dəyərində yeni vəsaitlə Azərbaycanda Risk Bölüşdürmə Mexanizmini yenidən işə salıb.

Yuxarida qeyd olunanlara parallel olaraq, yerli bizneslər də Bankın ticarət nişanı olan Kiçik Bizneslər üçün Məsləhət Proqramından faydalanıblar.

AYİB-in Azərbaycan üzrə rəhbəri Natali Mouravidze qeyd edib: “Ötən il, Azərbaycanda bizim üçün çox məhsuldar il oldu. Biz bərpa olunan enerji, ölkənin nəqliyyat potensialını maliyyələşdirdik və yeni və mövcud yerli tərəfdaş banklar vasitəsilə yerli biznesi dəstəklədik. Əldə olunan nəticələrə əsasən inanıram ki, əməkdaşlığımız növbəti illərdə də davam edəcək”.

AYİB Azərbaycanda aparıcı institusional investordur və burada 195 layihəyə 4 milyard avrodan çox sərmayə qoyub. Bankın ölkədəki strategiyası Azərbaycana iqtisadiyyatını şaxələndirməyə və qeyri-neft özəl sektorunu inkişaf etdirməyə kömək etməkdən ibarətdir.