(®) "Nobel Energy"nin törəmə şirkəti olan "Global Energy Solutions" (Glensol) ilk korporativ istiqrazların buraxılış prosesinə rəsmi olaraq başlayıb və bu, Azərbaycanın kapital bazarına daxil olması baxımından şirkət üçün mühüm addımdır.

Şirkətin yaydığı məlumata görə, bu, "Glensol" şirkətinin inkişaf planlarını və Azərbaycanın maliyyə sektorunun potensialını göstərir.

İstiqrazların ümumi məbləği 10 milyon AZN təşkil edir və rüblük qaydada faiz ödənilməklə, 12% cəlbedici kupon dərəcəsi təklif edilir. Buraxılış, hər biri 5 milyon AZN olaraq 2 tranşla həyata keçiriləcək, birincisi yanvarın 21-dən başlayaraq 2 həftə davam edəcək. Bu təşəbbüs investorları cəlb etmək və "Glensol" şirkətinin neft-mədən əməliyyatlarını və avadanlıqlar üzrə texniki xidmət fəaliyyətlərini dəstəkləmək məqsədi daşıyır.

"Glensol" güclü müştəri bazasına malikdir və bu BP və SOCAR kimi böyük milli və beynəlxalq enerji şirkətlərini də əhatə edir. Bu da müxtəlif strateji enerji layihələrindən sabit maliyyələşmənin əldə edilməsini və davamlı nəğd pul vəsaitlərinin hərəkətinin təminatına dəstək olur. Şirkət həm ənənəvi, həm də dayanıqlı enerji layihələrini dəstəkləmək üçün öz imkanlarından və sınaqdan keçmiş bacarıqlarından istifadə etməklə enerji keçidinə sadiq qalır.

"Bu buraxılışdan əldə edilən vəsait enerji sektorunda innovasiya məqsədinə xidmət edən inkişaf fəaliyyətləri də daxil olmaqla, dayanıqlı layihələr üçün istifadə ediləcək. İllik dövriyyəsi 6 milyard AZN təşkil edən Azərbaycanın kapital bazarlarının davamlı olaraq genişləndiyi bir vaxtda Glensol istiqrazlarının buraxılışı məqsədəuyğundur və bununla şirkət "NEQSOL Holding"in enerji seqmenti olan "Nobel Energy Group" daxilində öz mövqeyini də möhkəmləndirir", -məlumatda deyilir.

İnvestorlar "Glensol" şirkətinin güclü təcrübəsinə, eləcə də insanlara və texnologiyaya ağıllı sərmayələr qoyulmaqla, uzunmüddətli strateji inkişaf və dayanıqlılıq öhdəliyinə əsasən, bu sabit və gəlirli investisiya imkanını araşdırmağa təşviq edilirlər. İnvestisiya bazarı aktivdir, bazarda yerləşdirilən qiymətli kağızların ümumi dəyəri 535 milyon manata çatır və bu, "Glensol" şirkətinin təkliflərinin cəlbediciliyini daha da artırır.

İstiqraz və ya investisiya imkanları haqqında ətraflı məlumat əldə etmək üçün PAŞA Kapital şirkətinə rm@pashacapital.az elektron poçt ünvanı və ya +994 99 830 02 32 telefon nömrəsi ilə müraciət etmək olar.

Glensol haqqında

2012-ci ildə "Nobel Energy"nin mədən əməliyyatları və avadanlıqlara texniki xidmət üzrə törəmə şirkəti kimi yaradılmış "Glensol" regionda və bütün dünyada yerli və beynəlxalq neft və qaz şirkətləri üçün fırlanan avadanlıqların, o cümlədən turbomexanizm xidmətlərinin, eləcə də nəzarət, istismar və texniki servis xidmətlərinin etibarlı təchizatçısı olmuşdur.

Ətraflı məlumat: www.nobelenergy.com

PAŞA Kapital haqqında

PAŞA Kapital bazarda nail olduğu sağlam mövqeyi ilə tanınan və “Ən yaxşı İnvestisiya Şirkəti” və “Ən Yaxşı Broker Firması” kimi bilinən Azərbaycanın aparıcı investisiya şirkətidir.

XXX

İlk tranşda yerləşdirilməsi nəzərdə tutulan istiqrazlar üzrə məlumat:

Emitentin adı: “Global Energy Solutions” MMC

Dövlət qeydiyyat nömrəsi – İSİN: AZ2001025884

İstiqraqzların növü və forması: Faizli, təminatsız, sənədsiz, adlı istiqrazlar

Ticarət üsulu/forması:  Kütləvi / Abunə yazılışı

İstiqrazların sayı:  50 000 (ədəd)

İlkin ticarət qiyməti:  100 manat

Buraxılış həcmi: 5 000 000 manat

İllik gəlirlilik faizi:  12%

Ödəmə periodu:  İlk istiqrazın yerləşdirildiyi tarixdən etibarən ildə günlərin sayı 360 (üç yüz altmış) olaraq götürməklə hər 3 (üç) aydan bir (ayda günlərin sayı 30 (otuz) götürməklə) 

Tədavül müddəti:  2 il

Ticarətə buraxılma tarixi: Emitent tərəfindən bildiriləcək

Anderrayter:  “PAŞA Kapital İ.Ş.” QSC