"Bank BTB" 2024-cü il üzrə maliyyə göstəricilərini açıqlayıb.

GƏLİRLƏRİNDƏKİ ARTIM XƏRCLƏRİNDƏKİ ARTIMDAN 21 DƏFƏ ÇOX OLUB

Marja.az Bankın rüblük hesabatlarına istinadən xəbər verir ki, "Bank BTB"nin cəmi əməliyyat gəlirləri (faiz və qeyri-faiz gəlirləri) 2024-cü ildə 2023-cü illə müqayisədə 2 milyon 641 min manat və ya 7,6% artaraq 37 milyon 257 min manat təşkil edib. 2023-cü ildə "Bank BTB"nin cəmi əməliyyat gəlirləri 34 milyon 616 min manat təşkil etmişdi. 

"Bank BTB"nin cəmi əməliyyat xərcləri (faiz və qeyri-faiz xərcləri) 2024-cü ildə 2023-cü illə müqayisədə 124 min manat artaraq 31 milyon 987 min manat təşkil edib. 2023-cü ildə "Bank BTB"nin cəmi əməliyyat xərcləri 31 milyon 863 min manat təşkil etmişdi. 

Əməliyyat gəlirlərindəki artım əməliyyat xərclərindəki artımdan 2 milyon 517 min manat çox olduğundan, bankın əməliyyat mənfəəti də bir o qədər də artaraq 5 milyon 270 min manata yüksəlməsini təmin edib.

Ötən il "Bank BTB" 5 milyon 270 min manat əməliyyat mənfəətindən 1 milyon 135 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb. Həmçinin bankın 4 milyon 973 min manat gözlənilməz fəaliyyət növlərindən və əvvəlki dövr üçün uçotdakı dəyişikliklər üzrə xərci olub. Nəticədə "Bank BTB"nin  839 min manatlıq mənfi göstəricisi yaranıb. Qeyd edək ki, mənfi göstərici 2023-cü ildə 2 milyon 779 min manat idi. Ötən il bu göstəricinin 3,3 dəfə azalması diqqəti cəlb edir.

KREDİT PORTFELİ BÖYÜYÜB

31 dekabr 2024-cü il tarixində "Bank BTB" ASC 362 milyon 817 min manat cəmi aktivlərə, o cümlədən 270 milyon 47 min manat cəmi xalis kredit portfelinə (müştərilərə verilmiş kreditlər) malik olub. Bank 2023-cü ilin sonunda 369 milyon 155 min manat cəmi aktivlərə, o cümlədən 268 milyon 610 min manat cəmi xalis kredit portfelinə malik olmuşdu.

Ötən il "Bank BTB"də müştərilərin tələbli depozitləri 2 milyon 426 min manat artaraq 12 milyon 598 min manata çatıb.

MƏCMU KAPİTALI ARTIB

31 dekabr 2024-cü il tarixində "Bank BTB" ASC 51 milyon 87 min manat məcmu kapitala malik olub. Bank 2023-cü ilin sonunda 50 milyon 977 min manat məcmu kapitala malik idi.