"Yapı Kredi Bank Azərbaycan"dan 3 rübdə 8,3 milyon manat xalis mənfəət

"Yapı Kredi Bank Azərbaycan" QSC 2024-cü ilin 9 ayını (yanvar-sentyabr) 8.3 milyon manat xalis mənfəətlə başa vurub.

Bankın yaydığı press-relizdə bildirilir ki, keçən ilin müvafiq dövrü ilə müqayisədə cari ilin yanvar - sentyabr ayları üzrə faiz gəlirləri 18% artaraq 32 milyon manat, qeyri-faiz gəlirləri 16% artaraq 19 milyon manat təşkil edib. Ümumilikdə, xalis faiz gəlirləri keçən ilin analoji dövrü ilə müqayisədə 7% artaraq 27 milyon manat olmuşdur.

Qeyd edilib ki, cari ilin üçüncü rübündə bankda müştərilərə verilən kredit porfelininin həcmi keçən ilin sonu ilə müqayisədə 11% artmış və 325 milyon manat təşkil etmişdir. Belə ki, istehlak kreditləri 12% artaraq 76 milyon manata, daşınmaz əmlak kreditləri 35% artaraq 47 milyon manata çatmışdır. Biznes kreditləri cari ilin üçüncü rübündə 7% artaraq 202 milyon manat təşkil etmişdir.

Bankda depozit portfeli 403 milyon manat təşkil etmişdir. Fiziki şəxslərdə bu rəqəm keçən ilin sonu ilə müqayisədə 11% artaraq 100 milyon manat, hüquqi şəxslərin depozit portfeli isə keçən ilin sonu ilə müqayisədə 10% artaraq 303 milyon manat təşkil edib.

"Yapı Kredi Bank Azərbaycan" cari ilin üçüncü rübündə Azərbaycan Respublikası Mərkəzi Bank tərəfindən müəyyən olunmuş prudensial normativləri lazımı səviyyədə yerinə yetirmişdir. Belə ki, bankın I dərəcəli kapitalının adekvatlıq əmsalı 16.14%, məcmu kapitalının adekvatlıq əmsalı isə 18.82% olmuşdur. Bankın tutulmalardan sonra məcmu kapitalı 97 milyon manat təşkil edib. Qeyd edək ki, mövcud qanunvericiliyə əsasən minimum məcmu kapital norması 50 milyon manatdır.

Əsas səhmdarı Türkiyənin "Yapı Kredi A.Ş." bankı olan “Yapı Kredi Bank Azərbaycan” QSC Bakı və Sumqayıt şəhərlərində yerləşən filialları, 7/24 xidmət göstərən Telefon Mərkəzi (*0444) və İnternet/Mobil Bankçılıq məhsulları ilə müştərilərə geniş çeşiddə xidmət göstərir.

15.10.2024 11:57

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az