"Turan Bank" ASC 2024-cü ilin ilk 6 ayını (yanvar-iyun) 852 min manat xalis mənfəət ilə başa vurub. Bank 2023-cü ilin eyni dövrünü mümkün zərərlər üçün yaradılan məqsədli ehtiyatlara daha böyük məbləğdə vəsaitin ayrılması ilə əlaqədar olaraq 14 milyon 786 min manat xalis zərər ilə bağlamışdı. Beləliklə, bu il "Turan Bank" xalis mənfəət ilə fəaliyyət göstərir.

GƏLİRLƏRİ ARTIB

Marja.az xəbər verir ki, 2024-cü ilin ilk 6 ayında 2023-cü ilin ilk 6 ayı ilə müqayisədə "Turan Bank"ın cəmi əməliyyat gəlirləri (faiz və qeyri-faiz gəlirləri) 8 milyon 563 min manat və ya 19,7% artaraq 52 milyon 74 min manat, əməliyyat xərcləri (faiz və qeyri-faiz xərcləri) 1 milyon 449 min manat və ya 3,5% artaraq 43 milyon 248 min manat təşkil edib. Gəlirlərdəki artımın xərclərdəki artımdan yüksək olması ilə əlaqədar olaraq Bankın əməliyyat mənfəəti 7 milyon 114 min manat artaraq 8 milyon 826 min manat təşkil edib (2023-cü ilin ilk 6 ayında 1 milyon 712 min manat )

BANK BÖYÜYÜB

2024-cü ilin yanvar-iyun dövründə, ötən ilin sonu ilə müqayisədə “Turan Bank”ın cəmi aktivləri 48 milyon 999 min manat və ya 6% artaraq 871 milyon 772 min manata yüksəlib.

2024-cü ilin yanvar-iyun dövründə, ötən ilin sonu ilə müqayisədə “Turan Bank”ın kredit portfeli (müştərilərə verilmiş cəmi kreditlər) 15 milyon 610 min manat və ya 2,5 % artaraq 644 milyon 966 min manata çatıb. O cümlədən, istehlak kreditləri portfeli 2 milyon 133 min manat artaraq 144 milyon 715 min manata, biznes kreditləri portfeli 7 milyon 728 min manat artaraq 375 milyon 359 min manata, ipoteka kreditləri portfeli 5 milyon 748 min manat artaraq 124 milyon 891 min manata qalxıb.

2024-cü ilin yanvar-iyun dövründə, ötən ilin sonu ilə müqayisədə  “Turan Bank”ın cəmi öhdəlikləri 47 milyon 650 min manat və ya 6,4% artaraq 789 milyon 778 min manata çatıb. O cümlədən öhdəliklərin 454 milyon 228 min manatını depozitlər, 275 milyon 821 min manatını “Mərkəzi bank və dövlət fondları qarşısında” və “Kredit təşkilatları və digər maliyyə institutları qarşısında” öhdəliklər təşkil edib.

MƏCMU KAPİTALI DA ARTIB

30 İyun 2024-cü il tarixində “Turan Bank” ASC 102 milyon 697 min manat məcmu kapitala malik olub. Bank ötən ilin sonunda 85 milyon 116 min manat məcmu kapitala malik idi.