Böyük hissəsi dövlətə məxsus olan “Azər-Türk Bank” ASC 2024-cü ilin 1-ci yarısını (yanvar-iyun) 13 milyon 550 min manat xalis mənfəət ilə başa vurub. Bank ötən ilin eyni dövrünü 7 milyon 152 min manat xalis mənfəət ilə bağlamışdı. Beləliklə, “Azər-Türk Bank”ın xalis mənfəəti 2024-cü ilin ilk 6 ayında 2023-cü ilin eyni dövrü ilə müqayisədə 6 milyon 398 min manat və ya 89,5 % (1,9 dəfə) artıb.

GƏLİRLƏRİ ARTIB

Marja.az xəbər verir ki, 2024-cü ilin ilk 6 ayı ərzində “Azər-Türk Bank”ın cəmi əməliyyat gəlirləri (faiz və qeyri-faiz gəlirləri) 24 milyon 386 min manat və ya 55,9% artaraq 67 milyon 972 min manat, cəmi əməliyyat xərcləri (faiz və qeyri-faiz xərcləri) 16 milyon 860 min manat və ya 51% artaraq 49 milyon 915 min manat təşkil edib. Gəlirlər xərclərdən daha çox artdığı üçün Bankın əməliyyat mənfəəti 7 milyon 526 min manat artaraq 18 milyon 57 min manata yüksəlib (2023-cü ilin ilk 6 ayında 10 milyon 531 min manat).

Həmçinin, ilk 6 ayda Bank əməliyyat mənfəətindən 2 milyon 12 min manat mümkün zərərlər üçün yaradılan xüsusi ehtiyata ayırıb. 2023-cü ilin eyni dövründə “Azər-Türk Bank”  əməliyyat mənfəətindən 1 milyon 778 min manat xüsusi ehtiyata ayırmışdı.

BANK KƏSKİN BÖYÜYÜB

30 iyun 2023 - 30 iyun 2024-cü il dövründə “Azər-Türk Bank”ın cəmi aktivləri 646 milyon 200 min manat və ya 76% artaraq 1 milyard 496 milyon 59 min manata yüksəlib. Bankın kredit portfeli (müştərilərə verilmiş cəmi kreditlər) 344 milyon 760 min manat və ya 84,7% artaraq 751 milyon 594 min manata çatıb. O cümlədən, istehlak kreditləri portfeli 60 milyon 18 min manat artaraq 267 milyon 945 min manata, biznes kreditləri portfeli 254 milyon 28 min manat artaraq 298 milyon 288 min manata, ipoteka kreditləri portfeli 30 milyon 714 min manat artaraq 185 milyon 361 min manata qalxıb.

BANKDA ƏHALİNİN VƏ ŞİRKƏTLƏRİN PULU ARTIB

30 iyun 2023 - 30 iyun 2024-cü il dövründə “Azər-Türk Bank”da cəmi depozitlər 508 milyon 829 min manat və ya 2,3 dəfə artaraq 891 milyon 772 min manata yüksəlib. O cümlədən, Bankda fiziki şəxslərin depozitləri 18 milyon 889 min manat artaraq 225 milyon 37 min manata, hüquqi şəxslərin depozitləri isə 489 milyon 941 min manat artaraq 666 milyon 735 min manata yüksəlib.

MƏCMU KAPİTALI ARTIB

30 İyun 2024-cü il tarixində “Azər-Türk Bank” 91 milyon 118 min manat məcmu kapitala malik olub. Bank ötən ilin sonunda 78 milyon 437 min manat məcmu kapitala malik idi.