31 May 2024-cü il tarixində olan məlumata görə, bankların öhdəliklərinin strukturunda ənənəvi olaraq depozit portfeli üstünlük təşkil edir. Cəmi öhdəliklərin 81.4%-i və ya 34 milyard 835.2 milyon manatı depozitlərdir.

Bu barədə Marja.az Mərkəzi Bankın Statistik Bülleteninə istinadən xəbər verir.

Depozit portfelinin 61.5%-i (21 milyard 435.7 milyon manat) hüquqi şəxslərin, 38.5%-i (13 milyard 399.5 milyon manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir. 

Fiziki şəxslərin əmanət portfelinin 56.9%-i (7 milyard 625.5 milyon manat) müddətli əmanətlərdən ibarətdir. Fiziki şəxslərin əmanətlərinin 64.8%-i (8 milyard 684.6 milyon manat) milli valyutada, 35.2%-i (4 milyard 714.9 milyon manat) xarici valyutadadır. Hüquqi şəxslərin tələbli depozitləri 16 milyard 301.9 milyon manat olmaqla, hüquqi şəxslərin cəmi depozit portfelinin 76.1%-ni təşkil etmişdir .

Fiziki şəxslərin əmanətlərinin dollarlaşması may ayında əvvəlki ilin müvafiq dövrünə nəzərən isə 3.3 faiz bəndi azalaraq 34.7% təşkil etmişdir.

Ötən ili 31 May tarixində bankların cəmi öhdəliklərininin 82%-i və ya 32 milyard 678.7 milyon manatı depozitlər idi. Depozit portfelinin 62.8%-i (20 milyard 535.7 milyon manat) hüquqi şəxslərin, 37.2%-i (12 milyard 143 milyon  manat) fiziki şəxslərin depozitlərində (fərdi sahibkarlıqla məşğul olan fiziki şəxslərin depozitləri istisna olmaqla) ibarət idi. 

Bankların əmanət portfelinin 53.2%-i (6 milyard 454 milyon manat) müddətli əmanətlərdən ibarət olmuşdu. Hüquqi şəxslərin tələbli depozitləri 17 milyard 492.2 milyon  manat olmaqla, hüquqi şəxslərin cəmi depozit portfelinin 85.2%-ni təşkil etmişdi.

Fiziki şəxslərin əmanətlərinin dollarlaşması 2023-cü ilin may ayında ilin əvvəlinə nəzərən 1.2 faiz bəndi, əvvəlki ilin müvafiq dövrünə nəzərən isə 3.2 faiz bəndi azalaraq 38% təşkil etmişdi.