Hüquqi şəxslərin tələbli depozitlərinin müddətli depozitlərə keçməsi bank sektorunun uzunmüddətli aktiv generasiyası imkanlarını artırır.

Mərkəzi Bankın 2023-cü ilin yekunları üzrə Maliyyə Sabitliyi Hesabatında bildirilir ki, il ərzində hüquqi şəxslərin tələbli depozitləri 11.3% (2.2 mlrd. manat) azalaraq 17.5 mlrd. manat olmuş, hüquqi şəxslərin müddətli depozitləri isə 75% (1.9 mlrd. manat) artaraq 4.5 mlrd. manat təşkil etmişdir.

Qeyd edilib ki, hüquqi şəxslərin tələbli depozitlərinin yüksək dəyişkənliyi fonunda il ərzində müddətli depozitlərin stabil artımı müşahidə edilir. Nəticədə cəmi depozit portfelində müddətli depozitlərin payı 26%-dən 33%-ə yüksəlmişdir.

Vurğulanıb ki, milli valyutaya inamın artması fonunda sektorda depozitlərin dollarlaşmasında azalma müşahidə edilmişdir. Belə ki, il ərzində cəmi depozit portfelinin dollarlaşması 8.6 f.b azalaraq 38.4%, fiziki şəxslərin depozitlərinin dollarlaşma səviyyəsi 5.8 f.b. azalaraq 34%, hüquqi şəxslərin depozitlərinin dollarlaşması 10 f.b azalaraq 41% təşkil etmişdir. İqtisadiyyatda şəffaflığın artması və əhalinin milli valyutaya olan inamının yüksəlməsi fonunda bank sektorunda fiziki şəxslərin həm müddətli, həm də tələbli depozitləri üzrə dollarlaşmanın azalması müşahidə edilir. Belə ki, fiziki şəxslərin müddətli depozitlərinin dollarlaşması 4.7 f.b azalaraq 34.3%, fiziki şəxslərin tələbli depozitlərinin dollarlaşması isə 7.2 f.b azalaraq 33.5% olmuşdur.

Müddətli depozitlər

Müqavilə əsasında razılaşdırılmış müddətdə bankda yerləşdirilir və həmin müddət üçün faiz dərəcələri hesablanır. Vəsaiti vaxtından əvvəl hesabdan götürdükdə faizlərin bir hissəsini itirmək mümkündür.

Tələbli depozitlər

Müştəri öz vəsaitini qeyri müəyyən müddətə bankda yerləşdirir və istədiyi anda bankdan çıxara bilir. Belə məbləğlərə ya ümumiyyətlə faiz hesablanmır, ya da inflyasiyaya uyğun faizlər hesablanır.