Gürcüstanın "Bank of Georgia Group" (BOGG) şirkəti Ermənistanda fəaliyyət göstərən "Ameriabank"ın 100% paylarını əldə etmək üçün şərti müqavilə bağladığını elan edib. Müqavilənin 2024-cü ilin birinci rübündə tənzimləyicilər tərəfindən təsdiqlənəcəyi gözlənilir. 

Marja.az BOGG-nin yaydığı məlumata istinadən xəbər verir ki, müqavilənin dəyəri təqribən 303,6 milyon dollar təşkil edir və 31 oktyabr 2023-cü il tarixinə "Ameriabank"ın xalis aktivləri əsasında hesablanıb. 

"Ameriabank"ın sahiblərindən biri milyarder Ruben Vardanyandır (sərvəti, "Forbes Real-Time"in məlumatına görə, 1,1 milyard dollar).  

İlk öncə Gürcüstan şirkəti "Ameriabank"ın 90%-ni alacaq, 10% Avropa Yenidənqurma və İnkişaf Bankında (EBRD) qalacaq. Sonra səhm sahiblərinin seçim sazişi çərçivəsində BOGG-yə ötürüləcək. 

Qrupun bəyanatında deyilir ki, sövdələşmədən sonra BOGG "Ameriabank"ın adının dəyişdirilməsi prosesinə start verəcək.

"Ameriabank" vasitəsilə biz ən sürətlə inkişaf edən iqtisadiyyatlardan biri olan Ermənistana daxil olmaq niyyətindəyik", - deyə BOGG-nin İdarə Heyətinin sədri Mel Karvill bildirib. 

"Ameriabank"ın saytında verilən məlumata görə, hazırda onun əsas səhmdarları "İmast Group "(CY) Limited (48,82%), EBRD (17,71%), Asiya İnkişaf Bankı (13,91%) və ESPS Holding Limited-dir (12,05%). Vardanyan dolayı yolla "İmast Group"da əhəmiyyətli paya sahibdir.

2022-ci ilə qədər Vardanyan Rusiya vətəndaşı olub və "Forbes Rusiya" siyahısında yer alıb. 2022-ci ilin dekabrında Vladimir Putinin fərmanı milyarderin Rusiya vətəndaşlığından imtina etmək barədə ərizəsi qəbul edilib. İndi isə Vardanyan erməni milyarder kimi milyarderlərin "Forbes" qlobal siyahısına daxil edilib.

2022-ci ilin noyabrından 2023-cü ilin fevralına qədər Vardanyan Qarabağda qondarma hökumətə dəstək göstərib. O, sentyabrın 27-də Ermənistana getmək istəyərkən Azərbaycan xüsusi xidmət orqanları tərəfindən saxlanılıb. Bakıda terrorçuluğu maliyyələşdirmə, qanunsuz silahlı dəstələrin yaradılması və fəaliyyətində iştirak, habelə sərhədi qanunsuz keçməkdə ittiham olunub və həbs edilib. 

"Bank of Georgia Group" Böyük Britaniyanın təsis edilmiş holdinq şirkətidir. Qrupa Gürcüstanda fəaliyyət göstərən bankçılıq və ödənişlər biznesi daxildir.