2024-cü ilin ilk ticarət günündə 20 ildən çox müddətdə ilk dəfə eyni vaxtda səhm və istiqrazlarda kəskin ucuzlaşmalar baş verib.

Marja.az xəbər verir ki, S&P 500-i izləyən SPDR S&P 500 ETF Trust və uzunmüddətli istiqrazları izləyən iShares 20+ Year Treasury Bond ETF çərşənbə axşamı hər biri 0,6 faiz ucuzlaşıb.

İki ETF, istiqraz ETF-nin 2002-ci ildə istifadəyə verilməsindən bəri ilk dəfə ilin ilk ticarət günündə eyni vaxtda düşb. Nasdaq 100-də 1,7 faizlik eniş 2001-ci ildən bəri üçüncü ən pis ilk gün enişi olaraq qeydə alınıb.

Bank of America strateqlərinin fikrincə, texnoloji səhmlərində kəskin ucuzlaşma proqnozları konsensusa çevrilib. Qlobal fond indekslərində də vəziyyət o qədər də parlaq deyil.

MSCI All Country World Index və investisiya səviyyəli istiqrazları izləyən Bloomberg Qlobal Kumulyativ İndeksi ən azı 1999-cu ildən bəri bir il üçün ən pis başlanğıcını göstərib. Bu səhər Asiya Sakit Okean bölgəsində də satışlar davam edib. ABŞ fond fyuçersləri bu səhər bir qədər ucuzlaşıb və heç bir bərpa əlaməti yoxdur. ABŞ-ın 10 illik istiqrazlarının gəlirliliyi beş faiz bəndi artaraq 3,93 faizə geriləyib.

İranın dəstəklədiyi husilərin kommersiya gəmilərinə hücumları və ABŞ-ın bu hücumlara reaksiyası ilə Qırmızı dənizdə sular qızışarkən, qlobal təchizat zənciri təhlükə altındadır.

Konteyner daşıma nəhəngi Maersk bir daha Qırmızı dəniz vasitəsilə daşımalarını dayandırdığını açıqlayıb. Kopenhagendə yerləşən şirkətin öz internet saytında dərc etdiyi bəyanatda deyilir: “Qırmızı dəniz-Ədən körfəzi xətti ilə bütün gəmi keçidlərini növbəti bildirişə qədər dayandırmağa qərar verdik”.

Husilər İsrailin Qəzza zolağına hücumlarına cavab olaraq İsraillə əlaqəli gəmiləri hədəf aldıqlarını açıqlamışdı. Lakin Danimarka ABŞ-ın mühafizə qrupuna qoşulduqdan sonra Maersk gəmiləri yenidən husilərin hədəfinə çevrilib. ABŞ Husilərin qayıqlarını vurduqdan sonra İran bölgəyə bir hərbi gəmi göndərib ki, bu da daha geniş münaqişə ilə bağlı narahatlıqları artııb. 

Analitiklər bildirir ki, gərginliyi azaltmaq istəkləri yoxdur və nəticədə kommersiya gəmiləri daha çox hədəfə alınacaq və ABŞ-ın cavab vermə ehtimalı daha yüksəkdir.

Qırmızı dənizdəki hadisələr neft qiymətlərinə də təsir edir. İlk baxışda tədarükün çətinləşməsilə neft qiymətlərinin artacağı gözlənilsə də, əksinə, bu gərginliyin neftə tələbin azalmasına səbəb olacağı ehtimal edildiyindən qiymətlər düşür. Çərşənbə axşamı Brent markalı neft 1,5 faiz ucuzlaşaraq 76 dollardan bir qədər aşağı düşüb. Hazırda Brent nefti 0,18% ucuzlaşma ilə 75,74 dollardan ticarət olunur.