Rusiya Federasiyasının çay və qəhvə istehsalçıları rublun zəifləməsi və istehsal xərclərinin artması səbəbindən öz məhsullarının satış qiymətlərini tədricən artırırlar.

Marja.az xəbər verir ki. bu barədə sənayedəki nümayəndələr RİA Novosti-yə məlumat veriblər.

"Orimi" şirkətlər qrupu ("Greenfield", "Tess", "Princess Nouri" çay brendləri, "Jardin coffee", "Jockey") tərəfdaşları ilə bəzi çay və qəhvə məhsulları qruplarının satış qiymətlərinin 4-5% artırılmasını müzakirə edir. 

Öz növbəsində, “May” (Май) şirkətinin mətbuat xidməti (“Mayski”, “Lisma”, “Richard”, "Curtis" çay markaları) sentyabrın 1-dən satış qiymətlərinin 6-9% artırılmasının nəzərdə tutulduğu barədə məlumatı təsdiqləyib.

“Kommersant” çərşənbə günü yazıb ki, əsas çay və qəhvə istehsalçıları rublun zəifləməsi və kakao paxlası məhsuldarlığının azalması səbəbindən qiymətlərin artması fonunda sentyabr ayından etibarən pərakəndə satış qiymətlərini artırıacaqlar. "Rusiya istehlakçılarının müxtəlif qiymət kateqoriyalarında çay və qəhvə əldə etmək imkanı var", - Rusiya Kənd Təsərrüfatı Nazirliyi daha sonra şərh edərək, belə məhsulların qiymətinə ilk növbədə ölkədə istehsal olunmayan xammalın maya dəyərinin təsir etdiyini bildirib.

"İyun ayında biz tərəfdaşlarımızı çay və qəhvə məhsullarının bəzi qrupları üzrə satış qiymətlərində orta hesabla 4-5% artımla bağlı xəbərdar etmişik. Lakin bu, qiymətlərin birdən-birə qaldırıldığı anlamına gəlmir - bu, daha uzun prosesdir, qiymət artımları müzakirə olunur və mərhələli şəkildə baş verir”, - "Orimi" şirkətlər qrupunun mətbuat xidmətindən bildiriblər.

Onlar izah ediblər ki, qiymət artımı dolların bahalaşması və nəticədə xammalın bahalaşması ilə bağlıdır, çünki bütün çay və qəhvə istehsal edən ölkələr dollar ilə ticarət aparırlar.

Bundan əlavə, qiymətlərə yükdaşımanın bahalaşması və çatdırılma müddətinin artması təsir edir. "Bununla belə, qiymət artımı inflyasiya səviyyəsindən xeyli aşağıdır, çünki Rusiya Federasiyasında istehsal olunan çay və qəhvə məhsullarının maya dəyərinin təxminən 20-40%-ni təşkil edən əhəmiyyətli rubl komponenti kəskin qiymət artımının qarşısını almağa imkan verir",- mətbuat xidməti əlavə edib.

Qeyd edək ki, xəbərdə adı çəkilən Rusiyanın çay istehsalçılarının məhsulları Azərbaycan bazarında da satılır.