Yüksək faiz dərəcələri, inflyasiya, artan enerji qiymətləri, dövlət dəstəyi tədbirlərinin kəsilməsi Avropa İttifaqında böyük tənəzzül riskini artırır.

Marja xəbər verir ki, Bloomberg Economics-in analitikləri bu qənaətə gəliblər.

Ekspertlərin proqnozlarına görə, artan borclanma xərclərinin gecikmiş təsiri 2024-cü ildə pik həddə çatacaq ki, bu da ÜDM-i 3,8% azaldacaq. Dəstək tədbirlərinin ləğvi və enerji qiymətlərinin dinamikası bu rəqəmi 5%-ə qədər yüksəldə bilər.

Tədqiqatın həmmüəllifi Jamie Rush deyir ki, Avropa iqtisadiyyatı üzrə gələn il üçün ən yaxşı ssenari “yumşaq eniş”dir. Bu termin iqtisadiyyatın yavaş artıma, sonra isə tənəzzülə yaxınlaşan, lakin ondan qaçaraq potensial olaraq sabitliyə keçid prosesi kimi başa düşülür. Ekspert xəbərdarlıq edib ki, yüksək faiz dərəcələri iqtisadiyyata zərər verə bilər və “yüksək borc yükü olan, ciddi büdcə məhdudiyyətləri ilə üzləşən hökumətlər bizim öyrəşdiyimiz stabilləşdirici rolu yerinə yetirə bilməzlər”.

Agentlik bildirir ki, Avropa Mərkəzi Bankı (ECB) və maliyyə nazirlikləri iqtisadiyyatın dayanıqlığını və bu amillər altında tənəzzüldən qaçmaq qabiliyyətini sınayacaq çətin vəziyyətlə üzləşirlər.

"Bruegel" analitik mərkəzinin baş elmi işçisi Qreqori Kleis bildirib ki, qarşıdakı 12 ayda Avropa İttifaqının iqtisadiyyatı monetar və fiskal siyasətlərin sərtləşdirilməsi qərarlarının ən böyük təsiri dövrü ilə üzləşəcək. “Düzünü desəm, bir az narahatam”, -o əlavə edib.

İyulun sonunda Avropa İttifaqında faiz dərəcəsi ard-arda doqquzuncu dəfə qaldırılanda ECB-nin rəhbəri Kristin Laqard iqtisadi mənzərənin pisləşdiyini etiraf edib və sentyabrda da uçot dərəcəsinin yenidən qaldırılacağını istisna etməyib. ECB inflyasiya ilə mübarizə aparmaq üçün iqtisadi artımı "qurban verməyə" çağırıb.

Çin də iqtisadi çətinliklərlə üzləşir: məsələn, ötən ikinci rübdə ölkənin ÜDM-i ilk üç ayla müqayisədə cəmi 0,8% artıb. Ölənin Siyasi Bürosu koronavirusdan sonra bərpanın ağrılı sürətlə getdiyini etiraf etmək məcburiyyətində qalıb.

Çin səlahiyyətliləri iqtisadi vəziyyətin mənfi işıqlandırılmasını gizli şəkildə qadağan etməklə cavab verib. Yerli iqtisadçılar Pekinin təzyiqindən danışıblar, onlar bu səbəbdən şərh verməkdən imtina ediblər.