Qlobal investisiya bankı JPMorgan, ABŞ-ın mümkün tənəzzülü ərəfəsində qızıla investisiya fürsəti gördüyünü, qiymətlərin ilin sonuna qədər 2000 dolları keçəcəyini və 2024-cü ilə qədər faiz dərəcələrinin aşağı salınması ilə rekord səviyyələrə yüksələcəyini proqnozlaşdırır.

Marja xəbər verir ki, Bankın Qlobal Əmtəə Tədqiqatları üzrə İcraçı Direktoru Qreq Şirer (Greg Shearer) vurğulayıb ki, ABŞ Mərkəzi bankı (FED) gələn ilin ikinci rübündə gözlənilən faiz endirimlərini həyata keçirməyə başladıqda ABŞ-da real gəlirlərin azalması qiymətli metal üçün “əhəmiyyətli dəstək” olacaq.

Qızıl son 12 ayda ABŞ-ın faiz artımı dövrünün sonuna yaxınlaşdığını göstərən əlamətlər, mərkəzi bankların alışları və təhlükəsiz liman tələbləri ilə 15% bahalaşıb. Mayın əvvəlində qiymətli metal 2020-ci ildə qeydə alınan rekord həddə - 2075 dollara yaxınlaşmışdı.

JPMorgan, FED-in şərtləri (faizləri) yumşaltmağa başlamazdan bir müddət əvvəl ABŞ-da tənəzzül proqnozu ilə bağlı artan risklər fonunda qızılın unsiyasının qiymətinin 2024-cü ilin son rübündə 2175 dollar səviyyəsində olacağını gözləyir.

"Qarşıdakı 12-18 ay ərzində qızıl xeyli bahalaşacaq. Biz qızıl almaq üçün yaxşı bir nöqtədəyik", - Şirer deyib.

Bankın əmtəə araşdırmalarının rəhbəri qarşıdakı dövrdə iqtisadiyyatda baş verə biləcək inkişafları da qiymətləndirərək, proqnozlaşdırıb: “Qızıl və gümüş bazarları ABŞ-da yumşaq tənəzzül və ya sərt tənəzzül olacağına dair tərəddüdlü mövqedədir. Lakin daha nəzərə çarpan bir tənəzzül vəziyyətində faiz dərəcələrində daha dramatik bir azalma görəcəyik."

Digər tərəfdən, qızıla fiziki tələbat da artıb, məsələn, mərkəzi bankların alışları qiymətlər üçün güclü katalizatordur.

Geosiyasi risklərin qızılı hökumətlər üçün daha da cəlbedici etdiyini əlavə edən Şirer, “Biz həqiqətən alış və valyutalardan başqa aktivləri şaxələndirmək (diversifikasiya) üçün həvəs görürük”,- deyib.