Azərbaycan Respublikası Mənzil İnşaatı Dövlət Agentliyinin tabeliyində olan "MİDA" MMC 2022-ci ili 2 milyon 211 min manat xalis mənfəət ilə başa vurub. Şirkət 2021-ci ili 1 milyon 270 min manat xalis mənfəət ilə bağlamışdı. Beləliklə, ötən il "MİDA" MMC-nin xalis mənfəəti 941 min manat və ya 74% artıb.

Marja.az xəbər verir ki, "MİDA" MMC-nin müştərilər ilə müqavilələr üzrə gəlirləri 2021-ci ildə 79 milyon 274 min manat ikən, 2022-ci ildə 89 milyon 328 min manata yüksəlib (10 milyon 54 min manat və ya 12,7% artıb).

31 dekabr 2022-ci il tarixində "MİDA" MMC 448 milyon 25 min manat cəmi aktivlərə malik olub. Şirkət 2021-ci ilin sonunda 461 milyon 719 min manat cəmi aktivlərə malik idi. 

“MİDA” Məhdud Məsuliyyətli Cəmiyyəti ölkədə çoxmənzilli yaşayış binalarının tikintisinə rəvac vermək, Respublika vətəndaşlarının güzəştlə mənzillər əldə etmələrinə şərait yaratmaq, çoxmənzilli yaşayış binalarının tikintisi üçün ayrılan maliyyə vəsaitlərindən səmərəli istifadə edilməsini təşkil və təmin etmək məqsədilə Mənzil İnşaatı Dövlət Agentliyinin tabeliyində yaradılmışdır. Cəmiyyətin fəaliyyətinin əsas istiqaməti sərəncamına verilmiş torpaq sahələrindən istifadə etməklə vətəndaşların yaşayış sahələrinə ehtiyacını güzəştli qaydada ödəmək və mənzil-məişət şəraitini yaxşılaşdırmaq üçün müasir memarlıq üslubunda, ekoloji və enerji səmərəliliyi tələblərinə cavab verən çoxmənzilli binaların tikilməsini təmin etməkdir.

Agentliyin xalis mənfəəti 5 dəfədən çox artıb

Xəbər verdiyimiz kimi, Azərbaycan Respublikası Mənzil İnşaatı Dövlət Agentliyi (MİDA) 2022-ci ili 8 milyon 173 min manat xalis mənfəət ilə başa vurub. Agentlik 2021-ci ili 1 milyon 509 min manat xalis mənfəət ilə bağlamışdı. Beləliklə, ötən il Agentliyin xalis mənfəəti 5,4 dəfə artıb. Mənzil İnşaatı Dövlət Agentliyinin maliyyə gəliləri 2021-ci ildə 10 milyon 176 min manat ikən, 2022-ci ildə 10 milyon 849 min manata yüksəlib. 2021-ci ildə dövlərdən 2,1 milyon manat yardım almış Agentlik, ötən il dövlətdən yardım almayıb.