"Unicapital İnvestisiya Şirkəti" ASC-nin Portfel idarəçiliyi şöbəsi bazarların həftəlik analitikasını təqdim edir:

Daxili Bazar

• Avropa Yenidənqurma və İnkişaf Bankı (EBRD) bu il Azərbaycanda real ümumi daxili məhsulun (ÜDM) ötən illə müqayisədə 2,5% artacağını proqnzolaşdırır. Bank gələn il isə Azərbaycanda real iqtisadi artımın 2,7% olacağını ehtimal edir.

• 2023-cü ilin Yanvar ayında Azərbaycanın xarici ticarət əməliyyatlarının həcmi 3 milyard 289 milyon 529 min ABŞ Dolları təşkil edib. Dövlət Gömrük Komitəsinə istinadən, ixrac əməliyyatları 1 milyard 876 milyon 84 min ABŞ Dolları, idxal əməliyyatları üzrə 1 milyard 412 milyon 687 min ABŞ Dolları təşkil edib. Xarici ticarətdə saldo müsbət 464 milyon 156 min ABŞ Dolları olub.

• Ötən həftə 14 fevral 2023-cü il tarixində Maliyyə Nazirliyinin 40 mln manat həcmində, 3 illik istiqrazlarının yerləşdirilməsi üzrə hərrac keçirilmişdir. Hərrac zamanı 17 investor tərəfindən qiymət intervalı 87.752 (11.98%) manat və 94.854 (8.9952%) manat olan 40 sifariş təqdim edilmişdir. Maliyyə Nazirliyinin qərarına əsasən istiqrazların kəsmə qiyməti 92.4106 (9.99%) manat, orta ölçülmüş qiyməti 92.7133 (9.865%) manat müəyyən edilmişdir. Sifarişlərin nominal qiymətlə ümumi məbləği 120,730,500 manat, yerləşdirilmiş həcmi isə 60,000,000 manat təşkil etmişdir.

• Bu həftə 40 milyon AZN həcmində AR Maliyyə Nazirliyinin 2 illik istiqrazlarının hərracı keçiriləcək. Hərrac zamanı dövlət istiqrazlarına tələb təklifi üstələyəcəyi və qiymət Emitenti qane edəcəyi halda isə Emitent tərəfindən təklif edilən istiqrazların həcmi 50 faizədək artırıla bilər. Sonuncu dəfə 2 illik istiqraz hərracı 9.15% orta ölçülmüş gəlirliliklə nəticələnmişdi.

Qlobal bazar

• Ötən həftə ABŞ-da açıqlanmış vacib məlumatlar içərisində inflyasiya yer alıb. Belə ki, yanvar ayı üçün aylıq inflyasiya 0,5% olaraq açıqlanıb. Qeyd edək ki, əvvəlki göstərici -0,1% idi. Yanvar ayı üçün açıqlanmış illik inflyasiya gözləniləndən çox olsa da, əvvəlki göstəriciyə nisbətən azalıb. Belə ki, illik inflyasiya 6,4% olaraq açıqlanıb (əvvəlki 6,5%). İnflyasiyaya dair gözlənti isə 6,2% idi.

• ABŞ-da bu həftə fevral ayının 23-ü 4-cü rübün Ümumi daxili məhsulu açıqlanacaq. Gözlənti 2,9%-dir. Fevral ayının 24-ü isə şəxsi gəlir və xərclərə dair statistika açıqlanacaq. Həmin gün, həmçinin yanvar ayı üzrə yeni evlərin satışına dair məlumatlar təqdim ediləcək.

• Keçən həftə Avropa üçün keçən ilin 4-cü rübünün rüblük ümumi daxili məhsulu 0,1%, illik ümumi daxili məhsulu isə 1,9% olaraq açıqlanıb. Qeyd edək ki, açıqlanmış məlumatlar bazar gözləntisinə uyğun olub.

• Avropa üçün yanvar ayı üzrə aylıq və illik inflyasiya məlumatları 23 fevral tarixində açıqlanacaq. Aylıq göstərici üçün bazar gözləntisi -0,2% (əvvəlki -0,4%), illik göstərici üçün bu gözlənti 8,6%-dir (əvvəlki 8,5%).

Həftəlik analitikanı "Unicapital İnvestisiya Şirkəti" ASC-nin Portfel idarəçiliyi şöbəsi təqdim etdi.