"AzerGold" QSC-yə məxsus "Azerblast" MMC-nin Gəncədə inşa etdiyi mülki partlayıcı maddələrin istehsalı zavodunun ümumi investisiya dəyəri 14 milyon manatdır.

Bunu şirkətin icraçı direktoru Rizvan Baxşıyev bildirib.

"Layihə çərçivəsində inşaat işlərinə təqribən 5,5 milyon manat, avadanlıqların alınması və quraşdırılmasına 4 milyon manat vəsait sərf olunacaq. Layihə üzrə nəzərdə tutulan digər vəsaitlər isə əməliyyat xərclərini təşkil edir. Bütün bu vəsaitlər təsisçilər tərəfindən Nizamnamə kapitalına qoyuluşlar və sərfəli şərtlərlə əldə edilmiş kredit hesabına təmin olunacaq", - deyə o qeyd edib.

"Layihənin maliyyə modelində Xalis Cari Dəyər (NPV) 2,6 milyon manat, Daxili Gəlirlilik Dərəcəsi (IRR) isə 24,3% olaraq hesablanıb. Layihənin icrasına qoyulmuş investisiyanı müəssisənin tam gücü ilə fəaliyyəti nəticəsində 5,3 ilə qaytarmaq mümkün olacaq. Layihə üzrə fəaliyyətin ilk 6 ili üçün hesablanmış cəmi gəlir isə 90 milyon manat nəzərdə tutulub. Sonrakı illərdə də sənaye əhəmiyyətli partlayıcı maddələrə artan daxili və xarici tələbat fonunda istehsalın yüksək templə davam etdirilməsi nəticəsində satış gəlirləri daha da artacaq, müəssisənin uzunmüddətli, fasiləsiz və davamlı fəaliyyəti təmin ediləcək", - deyə R.Baxşıyev əlavə edib.

"Müəssisənin fəaliyyəti ən qabaqcıl texnologiya və avadanlıqlardan istifadə edilməklə təşkil olunacaq. Layihə üzrə Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinin təsdiq etdiyi Ətraf Mühitə Təsirin Qiymətləndirilməsi sənədinə əsasən, istehsalatın yüksək ekoloji norma və standartlara uyğunluğu təmin ediləcək", - deyə icraçı direktor fikrini tamamlayıb.

“AzerGold” və törəmə şirkətinin mülki partlayıcı maddəyə tələbatı açıqlanıb

Bu il qızıl və dəmir filizi mədənlərində süxurların partladılması üçün “AzerGold” QSC-nin mülki partlayıcı maddələrə tələbatı 1 445 ton, onun törəmə şirkəti “Daşkəsən Dəmir Filiz” MMC-nin isə tələbatı 1 735 ton həcmində proqnozlaşdırılır.

Bunu Gəncədə mülki partlayıcı maddələrin istehsalı zavodu inşa edən “AzerGold”a məxsus “Azerblast” MMC-nin icraçı direktoru Rizvan Baxşıyev bildirib.

Onun sözlərinə görə, zavodda ayda 500 ton, yəni ildə 6 min ton partlayıcı maddənin istehsalı planlaşdırılır ki, bunun da bir hissəsi səhmdar cəmiyyəti daxilində istifadə olunacaq, qalan hissəsi isə dağ-mədən və sənayenin başqa sahələrində fəaliyyət göstərən qurumlara yönəldiləcək.

“Növbəti illər üzrə artan tələbata uyğun istehsal həcminin də artırılması, məhsulların xarici bazarlara çıxarılması ilə ölkəmizin qeyri-neft ixracatına töhfə verilməsi hədəf olaraq müəyyənləşdirilib. Nəzərə alınmalıdır ki, Qarabağ və Şərqi Zəngəzur iqtisadi rayonlarında dağ-mədən sənayesi üzrə yaranmış potensial və həmin ərazilərdə aparılan quruculuq işləri ildən-ilə sənaye partlayıcı maddələrinə olan təlabatın artmasına səbəb olacaq. Araşdırmalarımıza əsasən, təkcə 2024-cü ildə sözügedən bölgələrimiz üçün 10-15 min ton həcmində illik tələbat həcmi proqnozlaşdırılır”, - deyə o qeyd edib.

İllik 12.99%-dən 40 000 AZN-dək zaminsiz komissiyasız kredit!

© Report