Təsərrüfat subyektlərində 2022-ci il ərzində POS-terminal vasitəsilə aparılan nağdsız əməliyyatların sayı 2021-ci il ilə müqayisədə 89.4% artaraq 199 milyon  ədəd, həcmi isə 47.7% artaraq 5.8 milyard manat olmuşdur. O cümlədən, 2022-ci il ərzində POS-terminallarla aparılan təmassız ödənişlərin sayı 2021-ci il ilə müqayisədə 2.6 dəfə artaraq 183.2 milyon ədəd, həcmi isə 2 dəfə artaraq 4.9 milyard manat olmuşdur.

Marja xəbər verir ki, bu, Azərbaycan Mərkəzi Bankının 2022-ci ilin Rəqəmsal ödənişlər icmalında bildirilir.

Qeyd edilib ki. son illər ərzində ölkənin həm Bakı və iri şəhərlərində, həm də regionlarında kart infrastrukturunun inkişafında müsbət tendensiya müşahidə edilmişdir. 01.01.2023-cü il tarixinə ölkə üzrə quraşdırılmış bankomatların sayı 3068, POS-terminalların sayı 79820, ödəniş terminallarınsayı isə 2029 ədəd olmuşdur.

2022-ci il ərzində ölkə üzrə bankomatların sayında 3.3%, regionlarda yerləşən bankomatların sayında isə 6.6% artım müşahidə edilmişdir.

01.01.2023-cü il tarixinə ölkədə dövriyyədə olan POS-terminalların sayı keçən illə müqayisədə 30.5% artaraq 79820-ə bərabər olmuşdur. Təmassız ödənişləri qəbul edən POS-terminalların sayı isə müvafiq dövr ərzində 58.5% artaraq 69599 ədəd təşkil etmişdir. Quraşdırılmış POS-terminalların 87.2%-i təmassız ödənişləri dəstəkləməkdədir. Regionlarda pərakəndə ticarət, ictimai iaşə və xidmət müəssisələrində quraşdırılmış POS-terminalların sayı 5029 və ya 25.2%, o cümlədən təmassız ödənişləri dəstəkləyən POS-terminalların sayı isə 9318 və ya 88.6% artmışdır.

2022-ci ilin sonuna banklar tərəfindən quraşdırılmış ödəniş terminallarının sayı 2021-ci ilin sonu ilə müqayisədə 10% artaraq 2029 ədəd təşkil etmişdir. Bakı şəhərində yerləşən ödəniş terminallarının sayında 15.2%, regionlarda yerləşən ödəniş terminallarının sayında isə 4.3% artım müşahidə olunmuşdur.