Azərbaycanda sahibkarlıq fəaliyyəti ilə bağlı qanunda dəyişikliyə ehtiyac var.

Bunu Azərbaycanda Qadın Sahibkarlığı Assosiasiyasının (AQSİA) İdarə Heyətinin sədri Səkinə Babayeva deyib.

Onun sözlərinə görə, hazırda qüvvədə olan “Sahibkarlıq fəaliyyəti haqqında” Qanunda sosial sahibkarlıqla bağlı əlavələrin edilməsinə ehtiyac var: "Rusiyada, Koreyada sosial sahibkarlıqla bağlı ayrı qanun qəbul edilib, Qazaxıstanda isə qanuna dəyişikliklər edilib”.

O əlavə edib ki, sahibkarlıq asan sahə deyil: "Sahibkarlar hər zaman dövlətdən dəstəyə ehtiyac duyurlar. Hər zaman sahibkarları təşviq etmək lazımdır ki, onlar vergi ödəməkdə maraqlı olsunlar, vergidən yayınmağın yollarını axtarmasınlar”.

S.Babayeva deyib ki, ölkədə qadınların iqtisadi təşəbbüskarlığının artması, onların kiçik və orta sahibkarlıqda geniş təmsilçiliyi sosial-iqtisadi inkişafın, o cümlədən, məşğulluğun təmin olunması baxımından mühüm əhəmiyyət kəsb edir:

“Qadın sahibkarlığına dəstəyin, əsasən də vergi güzəştlərinin verilməsi vacibdir. Qadınların bilik və bacarıqlarının, iqtisadi fəallıqlarının artırılması məqsədilə qadın sahibkarlara maliyyə və təşkilati dəstəyin genişləndirilməsinə ehtiyac var. Həmçinin, həssas qrupa aid olan qadınlarımız da nəzərə alınmalıdır. Qadınlar ilk işlərini başlayan zaman bəzən analıq məzuniyyətinə gedirlər, oxuyurlar. Qadınlar sosiallaşdıqdan sonra biznesə addım atmalıdırlar. Bundan sonra, biznesə başlamaları həm dövlət üçün, həm də qadınlarımız üçün çox vacibdir”.

S. Babayeva deyib ki, sahibkarlığın sənayeləşməsində böyük problem var:

“Bu problem ondan ibarətdir ki, bir çox qrant layihələri verilən zaman və ya proqramlar həyata keçirilən zaman insanlar avadanlıqlar əldə etmək istəyir, ondan yararlanmaq istəyir. Lakin bunu biznesə çevirmək üçün layihə təqdim edə bilmir. Bununla yanaşı, Dünya Bankının məlumatına görə, dünyada ayrılan qrantlardan yalnız 6 %-i reallaşa bilir”.

Xatırladaq ki, Azərbaycanda fərdi sahibkarların 22 %-i qadınlardı, iqtisadi fəal əhalinin isə 49 %-ni qadınlar təşkil edir.

İllik 12.99%-dən 40 000 AZN-dək zaminsiz komissiyasız kredit!

 “Report”