Mərkəzi Bankın sədri Taleh Kazımov 2023-cü ilin yanvar ayında Mərkəzi Bankda keçirilmiş valyuta hərraclarının 2-sində bankların sifariş təqdim etməmələrinin və digər hərraclarda tələbin aşağı olmasının səbəblərini açıqlayıb.

Marja.az-ın məlumatına görə, Taleh Kazımov ilk səbəbin, yüksək neft və qaz qiymətləri, həmçinin qeyri-neft sektoru üzrə ixracın artdığı şəraitdə Azərbaycana valyuta daxilolmalarının artması ilə əlaqədar olaraq xarici valyutaya tələbin azalması olduğunu bildirib.

"Sadəcə tələb azalıb", - Mərkəzi Bankın sədri deyib.

Taleh Kazımov qeyd edib ki, ötən il Mərkəzi Bank bazara 2 milyard 48 milyon dollarlıq alış yönümlü müdaxilə də edib.

Taleh Kazımov bildirib ki, ikinci səbəb Mərkəzi Bankın 2023-cü ilin Yanvar ayından etibarən Azərbaycanda ilk dəfə mütəşəkkil banklararası valyuta bazarını işə salmasıdır:

"Yanvarın 9-dan başlayaraq ilk dəfə olaraq mütəşəkkil banklararası valyuta bazarını yaratmışıq. Bu bazarda həm say, həm də həcm olaraq aktiv əməliyyatlar aparılır. Bu da ona imkin verir ki, banklar arasında valyuta ticarəti aparılır, həm artıq valyuatası olan, həm də valyuta kəsiri olan banklar bir araya gəlib öz ehtiyaclarını təmin edirlər. 

Keçmişdə belə idi ki, hansısa bankda artıq valyuta olduqda nağd şəkildə əməliyyat edib onu satırdılar. Sata bilmədikdə isə Mərkəzi Banka satılırdı. İndi bütün bankları yeni platformaya - mütəşəkkil banklararası valyuta bazarına dəvət etmişik, demişik ki, kimin artığı, kimin kəsiri varsa platforma vasitəsilə əməliyyat aparıb ehtiyacını ödəsin. Bu bazarda banklar artıq olan valyutasını sata və ya valyuta kəsirini bağlamaq üçün alış edə bilir. Buna görə, yanvarda Mərkəzi Bankda keçirilmiş valyuta hərraclarından ikisində banklar tərəfindən sifarişlər olmayıb, digər hərraclarda da aşağı olub". 

Xatırladaq ki, 24 yanvar 2023-cü il və 26 yanvar 2023-cü il tarixlərində Mərkəzi Bankda keçirilmiş valyuta hərraclarında banklar tərəfindən sifariş təqdim edilməmişdir. 19 yanvar 2023-cü il tarixində keçirilmiş valyuta hərracında bankların sifarişləri 1,5 milyon ABŞ dolları təşkil etmiş və tam təmin edilmişdi. 2022-ci ilin əvvəlindən bu yana keçirilmiş 8 valyuta hərracında banklara cəmi 188,6 milyon dollar satılıb.