"Unicapital İnvestisiya Şirkəti" ASC-nin Portfel idarəçiliyi şöbəsi bazarların həftəlik analitikasını təqdim edir:

Daxili Bazar

Ötən həftə AR Maliyyə Nazirliyinin 1 illik istiqrazlarının hərracında tələb təklifi 3.3 dəfədən çox üstələmiş, yerləşdirilmiş həcm 50 milyon AZN olmuşdur. Hərrac 7.54% orta ölçülmüş və 7.92% kəsmə gəlirliliklə nəticələnmişdir.

Bu həftə AR Maliyyə Nazirliyinin 50 milyon AZN həcmində 3 illik istiqrazlarının hərracı keçiriləcək. İstiqrazın faiz dərəcəsi 7.00%-dir (bundan öncə 5.00% idi). Ötən ay 3 illik istiqrazların hərracında orta ölçülmüş və kəsmə gəlirliliklər müvafiq olaraq, 8.82% və 10.00% olmuşdu.

Rəsmi məlumata əsasən qeyd edirik ki, AR Maliyyə Nazirliyi 2023-cü ildə 2 milyard AZN qısamüddətli, 3 milyard AZN ortamüddətli və 500 milyon AZN uzunmüddətli olmaqla cəmi 5.5 milyard AZN istiqraz emissiya etməyi planlaşdırıb.

AR Mərkəzi Bankının notlarının gəlirliliklərində artım müşahidə edilir. 84 günlük notlarda gəlirlilik 7.69%-dən 7.95%- ə, 168 günlük notlarda 8.22%-dən 8.57%-ə, 252 günlük notlarda isə 8.94%-dən 9.29%-ə artmışdır.

Ötən həftə Azərbaycanda ÜDM məlumatı açıqlanmışdır. 2022-ci ilin sonuna illik ÜDM artımı 4.6% olmuş, ÜDM həcmi isə 2021-ci il ilə müqayisədə 40.6 milyard AZN artaraq 133.8 milyard AZN və ya 78.7 milyard USD olmuşdur.

Bu həftə, 1 fevral tarixində AR Mərkəzi Bankı faiz dəhlizinin parametrləri ilə bağlı qərarını açıqlayacaq. Mərkəzi Bankın məlumatına görə, qərar əsasən illik inflyasiyanın dinamikasından və yenilənmiş proqnozlardan asılı olaraq veriləcək. Xatırladaq ki, Azərbaycanda 2022-ci ilin sonuna illik inflyasiya 13.9% olmuşdur.

Xarici bazar

Ötən həftə ABŞ-da ÜDM artım məlumatı açıqlandı. ÜDM artımı analitiklərin gözləntilərindən (2.6%) yüksək, 2.9% açıqlandı. Bu informasiya fonunda böhran gözləntiləri azalmış, ABŞ səhm bazarında pozitiv dəyişikliklər qeydə alınmışdı.

1 fevral tarixində FED faiz qərarını açıqlayacaq. İnflyasiyanın hələ də yüksək olaraq qalması fonunda bir çox analitiklər faizlərin 0.25% artırılaraq 4.25%-4.50% aralığından 4.50%-4.75% aralığına çatacağını proqnoz edirlər.

3 fevral tarixində ABŞ-da həmçinin məşğulluq göstəriciləri olan işsizlik dərəcəsi və qeyri-kənd təsərrüfatı sahəsində iş yerlərində dəyişiklik məlumatları açıqlanacaq.

2 fevral tarixində Avropa Mərkəzi Bankı faiz qərarını açıqlayacaq. Bloomberg analitikləri faizlərin 0.50% artırılaraq 2.50%-dən 3.00%-ə dəyişdiriləcəyini proqnoz ediblər. Dekabr ayında Avrozonada inflyasiya azalaraq 10.1%-dən 9.2%-ə düşmüşdü. 1 fevralda isə yanvar ayı üçün inflyasiya proqnozu açıqlanacaq. İnflyasiyanın 9.2%- dən 9.0%-ə düşəcəyi gözlənilir.

3 fevral tarixində Türkiyədə inflyasiya məlumatı açıqlanacaq. İnflyasiyanın 64.27%-dən 53.80%-ə düşəcəyi gözlənilir.

Həftəlik analitikanı "Unicapital İnvestisiya Şirkəti" ASC-nin Portfel idarəçiliyi şöbəsi təqdim etdi.