"Unicapital İnvestisiya Şirkəti" ASC-nin Portfel idarəçiliyi şöbəsi bazarların həftəlik analitikasını təqdim edir:

Daxili Bazar

- Ötən həftə AR Maliyyə Nazirliyinin 50 milyon AZN həcmində 2 illik istiqrazlarının hərracında tələb təklifi 2.7 dəfədən çox üstələmiş, orta ölçülmüş gəlirlilik 9.15% olmuşdu. Bundan öncəki 2 illik istiqraz hərracında orta ölçülmüş gəlirlilik 9.26% idi.

- AR Maliyyə Nazirliyi yanvar ayında nəzərdə tutulan emissiya planını açıqlayıb. Bu həftə 50 milyon AZN həcmində 1 illik və növbəti həftə də 50 milyon AZN həcmində 3 illik istiqrazların hərracları nəzərdə tutulub. Qeyd edək ki, AR Maliyyə Nazirliyi 2 illik istiqrazlarında faiz dərəcəsini 4.5%-dən 6.0%-ə qaldırıb. 3 illik istiqrazlarında da faiz gəlirlərində artım gözlənilir.

- AR Mərkəzi Bankının notlarının gəlirliliklərində ötən həftə də artım müşahidə edilib. 28 günlük və 84 günlük notlarda gəlirliliklər müvafiq olaraq, 6.32%- dən 6.70%-ə və 7.38%-dən 7.69%-ə qalxmışdır. 168 günlük və 252 günlük notların gəlirliliklərində əsaslı dəyişiklik olmamış, hərraclar müvafiq olaraq, 8.22% (bundan öncə 8.16%) və 8.94% (bundan öncə 8.91%) orta ölçülmüş gəlirliliklə nəticələnmişdi.

- Ötən həftə Azərbaycanda inflyasiya məlumatı açıqlanıb. 2022-ci ildə Azərbaycanda istehlak qiymətləri indeksi 2021-ci ilə nisbətən 13.9% təşkil edib. Ərzaq inflyasiyası 19.5%, qeyri[1]ərzaq inflyasiyası 8.6% təşkil edib.

Xarici bazar

- Ötən həftə Türkiyə uçot faiz dərəcəsini açıqladı. Gözləntilərə əsasən uçot faiz dərəcəsi dəyişdirilməyərək 9.00% saxlanıldı. Xatırladaq ki, Türkiyədə inflyasiya əhəmiyyətli dərəcədə azalaraq 84.39%-dən 64.27%-ə düşmüşdür.

- 18 yanvar tarixində Avrozonada inflyasiya məlumatı açıqlandı. Avrozonada inflyasiya dərəcəsi gözləntilərə də uyğun olaraq 9.2% açıqlandı.

Həftəlik analitikanı "Unicapital İnvestisiya Şirkəti" ASC-nin Portfel idarəçiliyi şöbəsi təqdim etdi.