(®) Coca-Cola İçecek-in (CCI) 2030-cu ilə qədər müəyyənləşdirdiyi Davamlı İnkişaf Öhdəliklərinə uyğun olaraq Coca-Cola Azərbaycan Bakı Dövlət Universiteti (BDU) ilə tərəfdaşlıq memorandumu imzalayıb.

Universitet tələbələrinin yerli və beynəlxalq tədbirlərdə iştirak miqyasını genişləndirməyi nəzərdə tutan tərəfdaşlıq memorandumu Coca-Cola Azərbaycanın baş direktoru Rəna Məmmədova ilə universitetin rektoru Elçin Babayev arasında imzalanıb. 

Memoranduma əsasən, tərəflər qida sənayesi sahəsində elmi tədqiqatlar aparacaq və yeni texnologiyaların işlənib hazırlanmasında birgə fəaliyyət göstərəcəklər. Bilik mübadiləsi və pilot iş imkanlarını əhatə edən memorandum Coca-Cola Azərbaycanın mütəxəssislərinin universitet tədbirlərində qonaq məruzəçi kimi iştirakını da nəzərdə tutur. Əməkdaşlıq çərçivəsində universitet könüllüləri şirkətin sosial məsuliyyət layihələrində də iştirak edəcəklər.

Coca-Cola Azərbaycanın baş direktoru Rəna Məmmədova CCİ-ın 2030-cu ilə qədər olan öhdəliklərinin “Müxtəliflik və Daxilolma” bəndinə uyğun olaraq şirkətin müxtəlif proqramlar, o cümlədən, universitetlərlə əməkdaşlığa başladığını vurğulayıb: “CCİ uzun müddətdir ki, fəaliyyət göstərdiyi ölkələrdə gənclərlə bağlı layihələr həyata keçirir. İndi Azərbaycanda biz gənc qadınların təcrübə və iş imkanlarını artıran layihələrə diqqət yetiririk və bu işdə tək olmadığımızı görməkdən şadıq. İnanıram ki, Bakı Dövlət Universiteti ilə əməkdaşlığımız sayəsində biz tələbə qızların həyatına müsbət təsir edəcək və onların inkişaf etdiyi mühit yarada biləcəyik”.  

Qeyd edək ki, bundan əvvəl Bakı Dövlət Universiteti Coca-Colanın “Tullantısız Dünya” proqramı çərçivəsində plastik tullantıların təbiətə təsirini azaltmaq məqsədilə həyata keçirilən “HORECA Pet Collection” layihəsinə dəstək olub. 

 Şirkətin əməkdaşlıq etdiyi universitetlər siyahısına isə  Azərbaycan Bakı Mühəndislik Universiteti, Azərbaycan Dövlət Neft və Sənaye Universiteti, həmçinin Azərbaycan Texniki Universiteti daxildir.

Xatırladaq ki, dünyanın ən nüfuzlu şirkətlərindən olan Coca-Cola Azərbaycanda 1994-cü ildən etibarən fəaliyyət göstərir. Coca-Cola məhsullarının Azərbaycanda istehsalçısı Türkiyənin Coca-Cola İçecek şirkəti tərəfindən təsis edilən “Azərbaycan Coca-Cola Bottlers LTD” MMC-dir. Ölkənin qeyri-neft sektorunun ilk və ən böyük investorlarından olan Coca-Cola İçecek 1996-cı ildə Sulutəpə qəsəbəsində istehsal zavodunu qurub.