Karandaşdan İT avadanlıqlarına qədər satan "Simplex" şirkəti "tender ulduzu"na çevrilir

Karandaşdan İT avadanlıqlarına qədər satan "Simplex" şirkəti "tender ulduzu"na çevrilir

Bu il şirkət təxminən 44 milyon manatlıq sifarişlər alıb.

Karandaşdan İT avadanlıqlarına qədər satan "Simplex" şirkəti "tender ulduzu"na çevrilir

"Simplex" QSC Elm və Təhsil Nazirliyinin tenderlərdə üstünlük verdiyi şirkətlərdən birinə çevrilib.

Marja.az xəbər verir ki, "Simplex" şirkəti 2022-ci ildə dövlət qurumları tərəfindən keçirilmiş tenderlərdə 8 dəfə qalib olub, o cümlədən, 4 dəfə Elm və Təhsil Nazirliyinin tenderlərində qalib elan edilib.

2022-ci ildə "Simplex" QSC qalib olduğu tenderlər üzrə 43 milyon 781 min manatlıq müqavilələr bağlayıb. Müqavilələrin 43 milyon 322 min manatlıq hissəsi Elm və Təhsil Nazirliyinin nəzdində təsərrüfat hesablı əsaslı Tikinti və Təchizat İdarəsi ilə bağlanmış müqavilələr üzrə olub.

Satınalma portalında verilən məlumata görə, 2021-ci ildə "Simplex" QSC Elm və Təhsil Nazirliyindən “Maşın və avadanlıqlar” xərc maddəsi üzrə bir sıra malların satın alınmasıüzrə 241 milyon 673 min 225 manatlıq və "İdman inventarının və digər avadanlıqların satın alınması" üzrə 146 milyon 486 min 551 manatlıq sifarişlər də alıb. Qeyd edək ki, bu məbləğlər yanlış da ola bilər, çünki satınalma portalında müqavilə məbləğlərinin səhv daxil edilməsi halları tez-tez baş verir.

"Simplex" QSC 2021-ci ildə 24 dəfə tender və müsabiqə qalibi olub. Şirkət ötən il də ən böyük məbləğli müqavilələri Elm və Təhsil Nazirliyi ilə bağlayıb.

Elm və Təhsil Nazirliyi "Simplex" QSC-dən, idman inventarı və avadanlıqlar, maşın və avadanlıqlar, dəftərxana ləvazimatları və təsərrüfat malları, yumşaq inventar, yataq ləvazimatları, xüsusi geyimlər, kartriclər satın alır.

2015-ci ildən fəaliyyət göstərən "Simplex" QSC sadə karandaşdan, mürəkkəb İT avadanlıqlarına qədər məhsul və xidmətlərin tədarükü üzrə ixtisaslaşıb. 2 min manat nizamnamə kapitalına malik olan şirkətin qanuni təmsilçisi Fətullayev Elmir Tofiq oğludur. Şirkətin hüquqi ünvanı Bakı şəhəri, Cəlil Məmmədquluzadə küçəsi, ev 102A-dır (City Point iş mərkəzi).