Bu gün Bakıda Verona Avrasiya İqtisadi Forumu öz işinə başlayır.

Marja.az Tass-a istinadən xəbər verir ki, Forumda Rusiya Federasiyası Baş nazirinin müavini Aleksey Overçuk, Azərbaycan Respublikası Baş nazirinin müavini Şahin Mustafayev, Rusiyanın iqtisadi inkişaf naziri Maksim Reşetnikov, Azərbaycanın energetika naziri Pərviz Şahbazov və İqtisadiyyat naziri Mikayıl Cabbarovun iştirakı gözlənilir. Tədbirdə “Rosneft”in rəhbərləri İqor Seçin və “Novatek”in rəhbərləri Leonid Mixelson, “İntesa Bank”ın rəhbəri Antonio Falliko, VTB-nin prezidenti Andrey Kostin, digər şirkət və maliyyə təşkilatlarının rəhbərləri, sahibkarlar, analitiklər, siyasi və ictimai xadimlər, diplomatlar iştirak edəcəklər.

Forum iştirakçıları qlobal enerji problemlərini, Avropanın enerji təhlükəsizliyini, qlobal geosiyasətdə biznesin rolunu və Atlantik okeanından Sakit okeana qədər iqtisadi əməkdaşlığın yaradılmasını müzakirə edəcəklər. Bundan əlavə, forum çərçivəsində “Azərbaycan - Avrasiya iqtisadi əməkdaşlığının əsas qovşağı və onun Aİİ ilə əlaqələrində perspektivlər” adlı xüsusi sessiyanın keçirilməsi, o cümlədən yeni iqtisadi əməkdaşlıq şəraitində maliyyə sektorunun işinə dair müzakirələrin aparılması planlaşdırılır.

Forumun qlobal mövzusu “Avrasiya yeni geosiyasi və sosial-iqtisadi nizama doğru yolda: yeni insan yönümlü iqtisadiyyata keçid”dir.

XV Verona Avrasiya İqtisadi Forumunun məqsədi Avrasiyada biznes dialoqunu təşviq etməkdir. Təşkilatçıların fikrincə, bu il tədbirə ev sahibliyi etmək üçün Bakının seçilməsi təsadüfi deyil: müasir Azərbaycan dünya miqyasında layiqli və əhəmiyyətli nüfuz qazanıb, təsirli ticarət-iqtisadi potensialı təsdiqləyib.

"Azərbaycanın paytaxtı ona görə seçilib ki, coğrafi baxımdan Avrasiya məkanının Atlantik və Sakit okean arasında yerləşən mərkəzi hissəsində, Avropa və Asiyanın sərhəddində yerləşir, tarixən ticarət yollarının kəsişdiyi yerdir. Sürətlə dəyişən dünyada , bu məkan bütün planetin təhlükəsizliyini və rifahını təmin etmək üçün xüsusi əhəmiyyət kəsb edir”, - deyə “Avrasiyanı tanı” Assosiasiyasının prezidenti Antonio Falliko izah edib.

15-ci Verona Avrasiya İqtisadi Forumu Azərbaycan İqtisadiyyat Nazirliyinin dəstəyi, “Avrasiyanı tanı” qeyri-kommersiya assosiasiyası və Roskonqres Fondunun təşkilatçılığı ilə keçirilir. 

Tədbir 28 oktyabrda da davam edəcək.