Hazırda Azərbaycanda fintex sahəsində 25-dən çox bazar iştirakçısı var.

Bunu Bakıda “Azərbaycan Fintex Assosiasiyası” İctimai Birliyinin təşkilatçılığı keçirilən “Azərbaycanda fintex ekosostemi: Bu gün və sabah" adlı konfransda qurumun İdarə Heyətinin sədri Ruslan Talıbov bildirib.

Talıbov qeyd edib ki, oyunçuların əsas fəaliyyət istiqamətləri onlayn ödəniş platformaları, elektron pul qabları, özünəxidmət köşkləri və sairdir. Onun sözlərinə görə, fintex şirkətlərinin təxminən 55,6%-i Azərbaycanda artıq zərərsizlik nöqtəsini keçmiş şirkətlərdir: "Bu şirkətlərin təxminən 11%-i məhsulun hazırlanması səviyyəsindədir, 44%-i inkişaf etməkdədir və təxminən 4-5%-i inkişaf edib bazarda oturuşmuş şirkətlərdir. Bazarda olan şirkətlərin təxminən 20%-i xaricdə fəaliyyət göstərən şirkətlərdir və yaxud xarici şirkətlərin Azərbaycanda nümayəndəlikləri qismində mövcuddurlar".

Bundan başqa, R.Talıbov deyib ki, qlobal innovasiya indeksinə görə, Azərbaycan 132 ölkə arasında 80-ci, rəqəmsallıq indeksinə görə isə 110 ölkə arasında 70-ci yerdədir.

“Pandemiya dövründə fintexlərin sayı 2 dəfə artıb”

Audit sahəsində “Böyük dördlük” şirkətlərinin apardığı araşdırmaya görə, dünyada koronavirus (COVID-19) pandemiyasının davam etdiyi 2020-2022-ci illərdə fintexlərin sayı 2 dəfə artıb.

Bunu Bakıda “Azərbaycan Fintex Assosiasiyası” İctimai Birliyinin təşkilatçılığı keçirilən “Azərbaycanda fintex ekosostemi: Bu gün və sabah" adlı konfransda Azərbaycan Mərkəzi Bankının (AMB) baş direktoru Fərid Osmanov bildirib.

“Əgər 2020-ci ildə 15 min fintex var idisə, 2022-ci ildə bu rəqəm 30 minə çatıb. Onların illik gəliri isə 80 milyard ABŞ dollarını keçib”, - o deyib.

AMB rəsmisinin sözlərinə görə, əksər ölkələrdə olduğu kimi, Azərbaycanda da rəqəmsallaşma prosesində maliyyə institutları öndə gedirlər.

Xatırladaq ki, bugünki tədbirdə maliyyə texnologiyaları sahəsində baş verən yeniliklər, bu sahənin qarşısında duran çağırışlar müzakirə edilir.

İllik 13.99%-dən 40 000 AZN-dək zaminsiz komissiyasız kredit!

© Report, APA