"Azsığorta" biznes strategiyasında dəyişiklik edib

Şirkət aqrar sığortaya fokuslanır

"Azsığorta" biznes strategiyasında dəyişiklik edib

"Azsığorta" biznes strategiyasında dəyişiklik edərək aqrar və əmlak sığortası üzrə satışı genişləndirir.

Şirkət yeni strategiya ilə daha çox aqrar sığortaya fokuslanmağı, o həmçinin hər zaman güclü olduğu əmlak sığortası üzrə portfelini genişləndirməyi hədəfləyir.

Şirkətin yaydığı məlumatda bildirilir ki, ötən il cəmi 90 kənd təsərrüfatı subyekti Azsığorta vasitəsi ilə sığorta təminatı əldə etdiyi halda, cari ilin ilk 7 ayında bu rəqəm 24 dəfə artaraq 2000-i ötmüşdür. Şübhəsiz, şirkətin bu istiqamətə daha çox resurs cəlb etməsi labüddür. Bunu nəzərə alaraq AzsığortaDirektorlar Şurası, avqustun 9-da biznes strategiyasında dəyişiklik etməklə Avtonəqliyyat Vasitəsi Sahiblərinin Mülki Məsuliyyətinin İcbari Sığortası üzrə satışlarını dayandırmaq qərarına gəlmişdir. Bu barədə tənzimləyici müvafiq qaydada məlumatlandırılmışdır. Əlbəttə, Azsığorta qüvvədə olan bütün sığorta polisləri üzrə öhdəliklərini tam şəkildə yerinə yetirəcək.

“Azsığorta öz prinsiplərinə sadiq qalaraq şirkətin maliyyə dayanıqlığını qorumaq və müştərilərə hər zaman daha yaxşı xidmət göstərmək üçün çalışır. Hazırda şirkət ölkənin aqrar sığorta sistemi ilə, Aqrar Sığorta Fondu və təsisçilərindən biri olduğumuz Aqrar Sığorta Müştərək Sığorta Şirkəti ilə əməkdaşlığı dərinləşdirərək, kənd təsərrüfatı sığortasına fokuslanır. Eyni zamanda bizim üçün ənənəvi olan əmlak və məsuliyyət sığortası üzrə fəaliyyət də inkişaf etdiriləcək. Əminəm ki, bu yeni istiqamətlə Azsığorta mövqeyini daha da gücləndirəcək, qeyd edilən sığorta növləri üzrə bazara təqdim olunacaq yeni məhsullarla müştərilərin diqqətini cəlb edəcək”, deyə Azsığorta ASC-nin Direktorlar Şurasının sədri Viladi Maniyev bildirib.

Ölkənin kapitallaşmaya görə aparıcı sığorta şirkətlərinin ilk üçlüyünə daxil olan Azsığorta ASC 2006-cı ildən fəaliyyət göstərir.

16.09.2022 12:02