Azərbaycan Dövlət Neft Şirkəti (SOCAR) Özbəkistanın “Özbəkneftqaz” şirkəti ilə əmkdaşlığın genişləndirilməsini nəzərdən keçirir.

“Özbəkneftqaz” şirkətinin yaydığı məlumata görə, sentyabrın 7-9-da SOCAR-ın nümayəndə heyəti “Özbəkneftqaz” SC-də və istehsalat müəssisələrində olub. Səfər “Özbəkneftqaz” ilə SOCAR arasında neft-qaz sahəsində əməkdaşlığın genişləndirilməsi məqsədilə hazırlanmış “Yol xəritəsi”nə uyğun olaraq həyata keçirilib.

Bildirilir ki, səfər zamanı Özbəkistanda dərin neft və qaz emalı yatağının hazırkı vəziyyəti və inkişaf perspektivlərinə dair təqdimat keçirilib. Müzakirələr zamanı neft-kimya layihələri, o cümlədən SOCAR-ın fəaliyyət istiqamətləri nəzərdən keçirilib.

Tərəflər korporativ idarəetmə sisteminin islahatı, transformasiyası və rəqəmsallaşdırılması istiqamətində aparılan islahatlar, fəaliyyət zamanı əldə edilmiş təcrübə ilə bağlı fikir mübadiləsi aparıblar.

Nümayəndə heyətinin üzvləri Qaşqədərya vilayətindəki “Uzbekistan GTL” zavodunun, Şurtan qaz-kimya kompleksinin və Şurtan neft-qazçıxarma idarəsinin istehsalat sahələrində olub, müəssisələrin texnoloji imkanları və istehsal prosesləri ilə tanış olublar.

SOCAR-ın nümayəndə heyətinin üzvləri “Özbəkneftqaz”ın regionda və bütövlükdə Müstəqil Dövlətlər Birliyi ölkələrində neft-qaz sənayesinə verdiyi töhfəni xüsusi qeyd ediblər. “Özbəkneftqaz”ın həyata keçirdiyi layihələrin perspektivlərini yüksək qiymətləndiriblər.

Səfərin nəticələrinə görə, nümayəndə heyətinin üzvləri iki şirkətin birgə işini davam etdirməyə və tərəflərin maraqları arasında təmas nöqtələri yaratmağa hazır olduqlarını bildiriblər. Tərəfdaşlar qeyd ediblər ki, “Özbəknefteqaz” müasir yüksək səmərəli layihələrin həyata keçirilməsi üçün bütün resurslara malikdir.

Xatırladaq ki, iyulun əvvəlində SOCAR və "Özbəkneftqaz" arasında hər iki dövlətdə neft yataqlarının birgə işlənməsi, eləcə də bərpa olunan enerji və rəqəmsallaşdırma layihələrində əməkdaşlıq üçün yol xəritəsi imzalanıb.