"Azərlotereya" ASC 2021-ci ildə səhmdarına 5 milyon 161 min manat ödəniş edib. Qeyd edək ki, "Azərlotereya" ASC-nin təsisçisi İqtisadiyyat Nazirliyidir.

Marja.az xəbər verir ki, ötən il "Azərlotereya" səhmdara ayırma olaraq 4 milyon 161 min manat, dividend şəkilində isə 1 milyon manat ödəniş edib. "Azərlotereya" ASC-dən Marja-ya bildirilib ki, 2021-ci ilin hesabatında yer alan səhmdara ayırma və dividend 2020-ci il ilə bağlıdır. Türkiyə şirkətinin törməsi (“YMT Sans B.V.”) idarəetməyə götürdüyü "Azərlotereya"ya görə 2022-ci ildə İqtisadiyyat Nazirliyinə ödənişlər etməyə başlayacaq. 

Qeyd edək ki, Azərbaycan Prezidenti İlham Əliyevin 16 yanvar 2021-ci il tarixli Sərəncamı ilə “Azərlotereya” Açıq Səhmdar Cəmiyyəti Türkiyə Respublikasının “Demirören Şans Oyunları Yatırımları A.Ş.” şirkətinin törəmə cəmiyyəti olan “YMT Sans B.V.” şirkətinə müqavilə əsasında idarəetməyə verilib. Şirkət 2022-ci ildən yeni lotereyalarını təqdim edib.

"Azərlotereya" ASC 2020-ci ildə səhmdarına 4 milyon 104 min manat ödəmişdi (səhmdara ayırma olaraq 3 milyon 104 min manat, divident olaraq 1 milyon manat).

Səhmdarlara ödənişlər və dividend şirkətin mənfəətindən ödənilib.

Qeyd edək ki, 2021-ci ildə "Azerlotereya" ASC-nin satışdan gəlirləri ötən ilə nisbətən 147% artaraq, 43.9 milyon manat təşkil etmiş, eyni zamanda lotereya iştirakçıları üçün ayrılmış uduş fondu isə ötən illə müqayisədə  212% artmışdır.

Şirkətin ümumi mənfəəti 170% artaraq, 7.7 milyon manatdan 20.9 milyon manata yüksəlmiş, xalis mənfəəti 73% artaraq 7.6 milyon manata çatmışdır. Bununla bərabər şirkətin fəaliyyətindəki inkişaf nəticəsində mənfəət vergisi olaraq dövlət büdcəsinə daxilolma əvvəlki ilə görə 290% artaraq, 5.1 milyon manat təşkil etmişdir.

2021-ci il ərzində şirkət, 5.6 milyon manat məbləğində investisiya edərək uzunmüddətli aktivlərini 1.1 milyon manatdan 6.7 milyon manata yüksəltmişdir. O cümlədən, Azərlotoreya ASC-nin 2021 il sonu cəmi aktivləri 31.8 milyon manat təşkil etmişdir. Şirkətin 2020-ci ilin sonunda cəmi aktivləri 11.1 milyon manat idi. 

Şirkətin cəmi kapitalı 33% artaraq, 9.7 milyon manata çatmışdır.

"“Azərlotereya ASC” 2021-ci ildəki fəaliyyəti ilə bağlı yaranmış bütün vergi öhdəliklərini qanunvericiliyə uyğun olaraq zamanında ödənmişdir və 2021-ci il ilə bağlı hər hansı bir vergi öhdəliyi qalmamışdır. İllik audit olunmuş hesabatın nəticələrində qeyd olunan vergi öhdəlikləri, ödəniş vaxtı 2022-ci ilin 31 Mart tarixinədək olan vergi öhdəlikləridir",- Şirkətdən veriləm məlumatda bildirilir.