Rəqəmsal inkişaf və nəqliyyat naziri Rəşad Nəbiyev "Technovate-Sabah Mələk İnvestorlar Klubu"nun təsisçiləri və 25 üzvü ilə görüşüb. Qeyd edək ki, Klub investorları bir araya gətirərək yerli və regional startaplara sərmayə yatırmalarını təşkil etmək məqsədilə təsis edilib.

Marja-nın məlumatına görə, görüşün keçirilməsində məqsəd nazir Rəşad Nəbiyevə və Nazirliyin rəhbər şəxslərinə "Technovate-Sabah Mələk İnvestorlar Klubu"nun fəaliyyəti, hazırda görülən və planlaşdırılan işlər barədə məlumat vermək olub. Görüş zamanı Klubun həmtəsisçisi Fərid İsmayılzadə təqdimatla çıxış edib.

Rəqəmsal inkişaf və nəqliyyat naziri Rəşad Nəbiyev "Technovate-Sabah Mələk İnvestorlar Klubu"nun yaradılmasını təşəbbüsünü yüksək qiymətləndirib, Nazirliyin və ona tabe olan qurumların Klubun fəaliyyətinə dəstək göstrərəciyini bildirib.

Nazir klubun fəaliyyətinin respublikanın innovasiya ekosistemi üçün böyük əhəmiyyət kəsb etdiyini vurğulayıb.

“Səsləndirilən istiqamətlər üzrə "Technovate-Sabah Mələk İnvestorlar Klubu’’ ilə birgə layihələrin həyata keçirilməsini labüd sayıram. Məqsədimiz ölkədə investisiya mədəniyyətinin formalaşmasına təkan vermək, biznes mühitinin optimallaşdırılmasına, yerli layihələrin xarici bazarlara çıxarılmasına, xarici investorların ölkəyə cəlb edilməsinə nail olmaqdır. Bu istiqamətdə potensial tərəfdaşlarla daha da yaxından əməkdaşlıq etmək niyyətindəyik”, - deyə R.Nəbiyev qeyd edib.

Görüşdə potensialı olan startaplar, onların problemləri, startap ekosisteminin inkişaf etdirilməsi, startaplara yerli investorların düzgün şəkildə cəlb edilməsi, dövlətin də startaplara maliyyə dəstəyilə şərik olması (dövlət-özəl tərəfdaşlığı) və digər məsələlər müzakirə edilib. Əldə edilən ilkin razılaşmaya görə, "Technovate-Sabah Mələk İnvestorlar Klubu"’ ilə əməkdaşlıq çərçivəsində “şərikli investisiya” (matching investment) modelinə xüsusi önəm veriləcək. Belə ki, hansısa startapa "Technovate-Sabah Mələk İnvestorlar Klubu" dəstəyilə yerli investorların yatıracaqları sərmayə qədər də dövlət investisiya yatıracaq və təşəbbüsün şəriklərindən biri olacaqdır.

Eyni zamanda, investorların maliyyə biliklərinin daha da artırılması üçün "Technovate-Sabah Mələk İnvestorlar Klubu" ilə İnnovasiya və Rəqəmsal İnkişaf Agentliyinin əməkdaşlığı çərçivəsində bir sıra tədbirlərin, o cümlədən investisiya üzrə təlim proqramlarının təşkili və gələcəkdə investorların Silikon Vadisinə səfərinin təşkili də razılaşdırılıb.

“Technovate-Sabah Mələk İnvestorlar Klubu”nun həmtəsisçisi Fərid İsmayılzadə geniş təqdimatla çıxış edərək vençur studio və klubların yaradılması və dəstəklənməsinin əhəmiyyətini önə çəkib. Klubun fəaliyyətindən danışan Fərid İsmayılzadə Azərbaycan, Gürcüstan və Orta Asiyada həyata keçirilən layihələrdən, ilkin inkişaf fazasında olan startaplara göstərilən toxum maliyyəşməsindən və beynəlxalq əməkdaşlıqdan danışıb.

Qeyd edək ki, "Technovate-Sabah Mələk İnvestorlar Klubu" yerli investorları bir araya gətirərək investorlar şəbəkəsini yaratmağı hədəfləyir. Kluba, startaplara 10.000-50.000 ABŞ Dolları civarında yatırım etməyə hazır olan investorlar cəlb olunur.

Qarşıdakı 1-2 il ərzində "Technovate-Sabah Mələk İnvestorlar Klubu"nun üzvlərinin sərmayə yatırdığı startaplardan birinin "unicorn" səviyyəsinə çatdırılması da hədəflənir. Məlumat üçün bildirək ki, dəyəri ilk dəfə 1 milyard dollara çatan startapa "unicorn" startap deyilir.

“Technovate-Sabah Mələk İnvestorlar Klubu”nun təsisçiləri Fərid İsmayılzadə və “SABAH.lab” Akselerasiya Mərkəzidir.  Klubun İcraçı direktoru Orxan Bağırovdur.