Azərbaycan Mərkəzi Bankından yenicə lisenziya almış “Troni” istisna olmaqla, ölkənin qiymətli kağızlar bazarında fəaliyyət göstərən 11 investisiya şirkətinin 2021-ci ildə məcmu xalis mənfəəti 7 milyon 753 min manat təşkil edib.

Bu, 2020-ci illə müqayisədə 25,7% çoxdur.

İnvestisiya şirkətlərindən 2-si – “MFX-Trading” və “Plato Capital and Co.” ötən ili zərərlə başa vurub. Hesabat dövründə 1-cinin zərəri artıb, 2-cinin zərəri isə azalıb. 2021-ci ildən mənfəətlə çıxmış qalan 9 maliyyə qurumundan isə 1-i – “ABB-İnvest” 2020-ci ildən zərərlə çıxdığı, 1-i – “CPM-İnvest” isə bazara ötən il daxil olduğu üçün onların mənfəətinin/zərərinin dinamikasını hesablamaq mümkün olmayıb. Həm ötən ili, həm də əvvəlki ili mənfəətlə başa vurmuş 7 investisiya şirkətindən isə 2-si – “BTB Kapital” və “PAŞA Kapital” mənfəətini azaldıb, qalanları isə artırıb.

Ötən il investisiya şirkətlərinin vergiyəqədərki mənfəəti 9 milyon 748 min manat olub ki, bu da əvvəlki ilə nisbətən 23,9% çoxdur. Maliyyə qurumlarının ayrı-ayrılıqda vergiyəqədərki mənfəətlə bağlı vəziyyəti xalis mənfəətdə olduğu kimidir.

2021-ci ildə investisiya şirkətlərinin məcmu mənfəət vergisi ödəmələri isə 1 milyon 992 min manat təşkil edib. Bu da illik müqayisədə 17,5% çoxdur. İnvestisiya şirkətlərindən 2-si – “MFX-Trading” və “Plato Capital and Co.” ötən ili zərərlə başa vurduqları üçün vergi ödəməyiblər. 2021-ci ildə vergi ödəmiş qalan 9 maliyyə qurumundan 1-i “ABB-İnvest” 2020-ci ildə vergi ödəmələrinə qənaət etdiyi, 1-i – “CPM İnvest” isə bazara ötən il daxil olduğu üçün onların vergi ödəmələrinin dinamikasını hesablamaq mümkün olmayıb. Həm ötən il, həm də əvvəlki il vergi ödəmiş 7 investisiya şirkətindən 3-ü - “BTB Kapital”, “İnvest-AZ” və “PAŞA Kapital” vergi ödəmələrini azaldıb, qalanları isə artırıb.

Azərbaycandakı investisiya şirkətlərinin məcmu aktivləri 2 dəfədən çox artıb

Azərbaycan Mərkəzi Bankından yenicə lisenziya almış “Troni” istisna olmaqla, ölkənin qiymətli kağızlar bazarında fəaliyyət göstərən, 11 investisiya şirkətinin bu il yanvarın 1-nə məcmu aktivləri 185 milyon 154 min manat təşkil edib.

Bu, ötən il yanvarın 1-i ilə müqayisədə 2,1 dəfə çoxdur.

Hesabat dövründə investisiya şirkətlərindən 1-i – “Unicapital” aktivlərini azaldıb, qalanları isə artırıb.

Ötən ilin sonuna investisiya şirkətlərinin məcmu öhdəlikləri 151 milyon 615 min manat olub ki, bu da əvvəlki ilin sonuna nisbətən 2,4 dəfə çoxdur. Maliyyə qurumlarından 1-i – “Unicapital” öhdəliklərini azaldıb, qalanları isə artırıb.

Hesabat tarixinə investisiya şirkətlərinin məcmu balans kapitalı isə 33 milyon 538 min manat təşkil edib. Bu da illik müqayisədə 36,9% çoxdur. Maliyyə qurumlarından 2-si – “İnvest-AZ” və “Unicapital” balans kapitalını azaldıb, qalanları isə artırıb.

Bu il yanvarın 1-nə investisiya şirkətlərinin məcmu nizamnamə kapitalı isə 16,791 milyon manat olub. Bu isə ötən il yanvarın 1-nə nisbətən 23,9% çoxdur. Maliyyə qurumlarından 2-si – “ABB-İnvest” və “Plato Capital and Co.” nizamnamə kapitalını artırıb, qalanları sabit saxlayıb.

İllik 14.5%-dən 30 000 AZN-dək zaminsiz komissiyasız kredit!

© Report