Bu gün Türkiyə Cümhuriyyəti Mərkəzi Bankı (TCMB) növbəti faiz qərarını açıqlayacaq.

Marja.az xəbər verir ki, Mərkəzi Bankın faizini 14 faiz səviyyəsində sabit saxlayacağı gözlənilir. 

Son məlumatlar inflyasiyanın yüksəlməsi tempinin davam etdiyini göstərib. Türkiyə Statistika Komitəsinin (TÜİK) məlumatına görə, aprel ayında ölkədə illik inflyasiya 70%-ə çatıb. İqtisadçıların proqnozları göstərir ki, son 20 ilin ən yüksək səviyyəsinə çatan inflyasiyanın pik nöqtəsi hələ də müşahidə olunmayıb və artım daha bir neçə ay davam edə bilər.

İnflyasiyanın yüksəlməsinə baxmayaraq bir sıra qurumlar Mərkəzi Bankın faiz dərəcəsinin ilin sonuna qədər dəyişməyərək 14 faiz səviyyəsində qalacağını proqnozlaşdırırlar. Bəzi iqtisadçılar isə hesab edirlər ki, məzənnənin düşməsi üçün Mərkəzi Bank faiz artırmalıdır, bu da dolayı yolla inflyasiyanın aşağı düşməsinə səbəb olacaqdır.

Ötən ilin sonunda TCMB faizini tədricən 5 bənd azaldaraq 14 faizə endirmişdir.

Faizin azaldılması məzənnə böhranına və inflyasiyanın kəskin artmasına səbəb olsa da, fevralda Rusiyanın Ukraynaya hücumundan sonra artan qlobal enerji xərcləri qiymət artımlarını daha da sürətləndirib.

Keçən ilin son rübündə faizin aşağı salınması Türk lirəsinin dəyər itirməsinə səbəb olub və bu proses müharibənin təsirilə sürətlənib. Dollar və Avro bahalaşdığından idxal qiymətlərinin artması inflyasiyanı gücləndirib. Rusiyanın Ukraynaya hücumu səbəbilə uzun müddətdir dar dəhlizdə əməliyyat olunan Dollar/TL bu il maliyyə bazarlarında baş verən qlobal proseslərlə 20%-dən çox yüksəlib.

Mayın 24-də Dollar/TL məzənnəsi dekabrın 20-dən bəri ilk dəfə 16 səviyyəsini keçib. 2022-ci ilin əvvəlindən bəri məzənnədə artım 20 faizi aşıb (Türk Lirəsi 20% dəyərdən düşüb). Bu gün Bakı vaxtı ilə saat 08:14-də Dollar 16,37 türk lirəsinə bərbər olub.

Qlobal bazarlarda risk iştahı azalıb, dollarda bahalaşma müşahidə olunub.