“Xalq Bank” ASC tənzimləyicinin kapitalın adekvatlığına olan tələblərini yerinə yetirir. Bu barədə “Moody`s” reytinq agentliyi qeyd edir.

“1 may tarixinə bankın məlumatına görə, I dərəcəli kapitalın adekvatlıq əmsalı 14,5%, kapitalın adekvatlıq əmsalı 15,4% təşkil edib, bu da tənzimləyicinin müvafiq olaraq 5% və 10% səviyyəsində minimal tələblərinə uyğundur”, - deyə agentlik bildirib.

Buna baxmayaraq, “Moody`s” “Xalq Bank”ın kapitallaşmasını ehtiyatların nisbətən aşağı səviyyəsi nöqteyi-nəzərindən “sadə” kimi qiymətləndirir.

“2016-cı ilin sonuna bankın ümumi kredit portfelində vaxtı ötmüş kreditlərin payı 14,7%, təkrar strukturlaşdırılan kreditlərin payı 24,6% təşkil edib”, - deyə agentlik vurğulayır.

“Moody`s” qeyd edir ki, bankın kredit portfeli növbəti 12-18 ay ərzində ehtiyat fondu üçün əlavə xərclər tələb edir. Çünki kreditlərin və borcların ödənilməsinə 7,9% səviyyəsində ehtiyatlar kredit risklərinin ödənişi üçün kifayət olmayacaq.

“Əsas ssenariyə əsasən, yüksək kredit xərcləri səbəbindən bank cüzi gəlirli və ya zərərsiz olacaq”, - deyə məlumatda deyilir.  

“Marja”nın xəbər verdiyi kimi, Azərbaycanda aktivlərinin həcminə görə 4-cü böyük bank olan “Xalq Bank” ASC "Moody's” tərəfindən  “çox yüksək riskli” bank elan edilib

Nüfuzlu kredit reytinqi agentliyi "Moody's Investors Service" “Xalq Bank”ın kredit reytinqini  (kredit ödəmə qabiliyyətinin baza səviyyəsini)"b3"-dən "caa1"ə, uzunmüddəli depozit reytinqini isə "B2"dən "B3"ə endirib, proqnoz isə "neqativ"dir.

Agentliyə görə, "Xalq Bank"ın aktivləri və gəlirliliyi təzyiq altındadır.

"Moody's” bildirir ki, reytinqlərin azaldılması, Manatın devalvasiyalarının mənfi təsiri fonunda davamlı əlverişsiz şəraitdə fəaliyyət göstərən bankların kapital buferlərinin, maliyyələşmələrinin və likvidliklərinin pisləşməsini əks etdirir.

"Moody's”in reytinq cədvəlinə görə,  "caa1" səviyyəsinin açıqlaması “Çox yüksək kredit riski”, “B3” səviyyəsinin açıqlaması isə “önəmli dərəcədə spekulyativ” deməkdir (Spekulyativ xarakterli, yüksək kredit riski).  

Kredit ödəmə qabiliyyətinin baza səviyyəsi (Baseline Credit Assessments (BCAs) xarici dəstək olmadan bankın defolt ehtimalını təsvir edir.

Banka kredit reytiniqi təyin edilərkən sistem riskləri, bankın maliyyə vəziyyəti , ölkədəki makro vəziyyət təhlil edilir.

© İnterfaks-Azərbaycan, Marja