“Bu gün bizim PAŞA Şirkətlər Qrupunun işğaldan azad edilmiş rayonların yenidən qurulmasına dəstəyin gələcək illər üçün strateji planına daxil edildiyini söyləmək bizi sevindirir. Dirçəliş prosesində prioritetləri nəzərə alaraq, müvafiq layihələr həyata keçirir, öz növbəsində bu istiqamətdə inkişaf planlarımızı müvafiq dövlət orqanları ilə razılaşdırırıq. Bir çox törəmə müəssisələrimiz artıq dirçəliş prosesində birbaşa iştirak edir”.

Marja xəbər verir ki, bunu PAŞA Holding-in Baş İcraçı Direktorunun müavini Şahin Məmmədov Qarabağın PAŞA şirkətlər qrupunun strategiyasında olan yeri və əhəmiyyəti, eləcə də orada həyata keçirilən layihələr barədə məlumat verərkən bildirib.

Şahin Məmmədov  bildirib ki, hazırda holdinqin  kənd təsərrüfatı şirkəti “AgroDairy” işğaldan azad edilmiş Ağdam və Füzuli ərazilərində torpaqlarda əkin işlərinin həyata keçirilməsilə məşğuldur. Eyni zamanda, özəl sərmayə qolu olan “PAŞA İnvestments” ilə Türkiyədən tərəfdaş şirkət arasında birgə müəssisə vasitəsilə Zəngilan və Cəbrayıl rayonlarında kənd təsərrüfatı və heyvandarlıq üzrə işlər həyata keçirilir:

“Yəqin ki, bilirsiniz, Bravo qələbədən az sonra Şuşada mağaza açdı ki, həmin ərazidə xidmət edən əsgər və zabitlər bütün lazımi malları rahat əldə edə bilsinlər. Eyni zamanda, otel qrupumuz investisiya portfelini nəzərdən keçirir və bölgədəki variantları qiymətləndirirlər. Bu günə kimi “Absheron Hotel Group” Ağdamda yeni otelin tikintisinə başlayıb.

Maliyyə sektoruna gəlincə, həm PAŞA Bank, həm də Kapital Bank Şuşada yeni filialların açılması üçün rəsmi icazə almaq üçün Azərbaycan Mərkəzi Bankına müraciət edəcək. “PAŞA Sığorta” və “PAŞA Həyat Sığorta” şirkətlərinin də Şuşada filiallarının açılması planlaşdırılır. Bundan əlavə, Kapital Bank işğaldan azad edilmiş bütün digər rayonlarda da yeni filiallar açaraq müştərilərə xidmət göstərməyi planlaşdırır. Bunlar bizim regionun dirçəlişinə töhfə vermək üçün atmağı planlaşdırdığımız konkret bizneslə bağlı addımlardır və mən əminəm ki, Qarabağ yaxın gələcəkdə təkcə ölkənin deyil, regionun mərkəzinə çevriləcək”.