“Günay Bank” 2021-ci il üzrə maliyyə göstəricilərini açıqlayıb.

Marja.az xəbər verir ki, “Günay Bank” 2021-ci ili təxminən 410 min manat xalis mənfəət ilə başa vurub. Bank 2020-ci ili 408 min manat xalis mənfəət ilə bağlamışdı. Ötən il “Günay Bank” böyüyüb, gəlirləri, əməliyyat mənfəəti və məcmu kapitalı artıb.

GƏLİRLƏRİ ARTIB

2021-ci ildə “Günay Bank”ın cəmi əməliyyat gəlirləri (faiz və qeyri-faiz gəlirləri) 21 milyon 490 min manat təşkil edib ki, bu da 2020-ci il ilə müqayisədə 15,6% (və ya 2 milyon 901 min manat) çoxdur. 2020-ci ildə “Günay Bank”ın cəmi əməliyyat gəlirləri 18 milyon 589 min manat təşkil etmişdi.

2021-ci ildə “Günay Bank”ın cəmi əməliyyat xərcləri (faiz və qeyri-faiz xərcləri) 18 milyon 962 min manat təşkil edib ki, bu da 2020-ci il ilə müqayisədə 14% (və ya 2 milyon 322 min manat) çoxdur. 2020-ci ildə “Günay Bank”ın cəmi əməliyyat xərcləri 16 milyon 640 min manat təşkil etmişdi.

ƏMƏLİYYAT MƏNFƏƏTİ ARTIB

Ötən il “Günay Bank”ın cəmi əməliyyat gəlirləri cəmi əməliyyat xərclərini üstələdiyindən Bankın 2 milyon 528 min manat əməliyyat mənfəəti yaranıb. Bank əməliyyat mənfəətindən 2 milyon 118 min manat mümkün zərərlər üçün yaradılan məqsədli ehtiyatlara ayırdığından ili 410 min manat xalis mənfəət ilə bağlayıb.

Xatırladaq ki, 2020-ci ildə “Günay Bank”ın əməliyyat mənfəəti 1 milyon 948 min manat təşkil etmiş və mümkün zərərlər üçün yaradılan ehtiyatlara 1 milyon 540 min manat ayrıldığından ili 408 min manat xalis mənfəət ilə başa vurmuşdu.

“Günay Bank”ın 2021-ci ildə faiz gəlirləri 2020-ci illə müqayisədə 7,5% artaraq 13 milyon 906 min manata, qeyri-faiz gəlirləri isə 34,2% artaraq 7 milyon 584 min manata yüksəlib.

BANK BÖYÜYÜB

“Günay Bank”ın cəmi aktivləri 2020-ci illə müqayisədə 2021-ci ildə 4,7% və ya 11 milyon 426 min manat artaraq 256 milyon 469 min manata yüksəlib. Bank 2020-ci ilin sonunda 245 milyon 43 min manat cəmi aktivlərə malik idi.

“Günay Bank”ın kredit portfeli (müştərilərə verilmiş kreditlər) 2020-ci illə müqayisədə 2021-ci ildə 4,5% və ya 8 milyon 910 min manat artaraq 199 milyon 775 min manata yüksəlib. 2020-ci ilin sonunda Bankın kredit portfeli 190 milyon 865 min manata çatmışdı. Bankın ipoteka kreditləri portfeli 14.7% və ya 9 milyon 164 min manat artaraq 71 milyon 601 min manata, istehlak kreditləri portfeli isə 15,1% artaraq 2  milyon 533 min manata yüksəlib. Biznes kreditləri portfeli isə cüzi – 0,5% azlaraq 125 milyon 640 min manata geriləyib.

“Günay Bank”ın depozit portfeli 2020-ci illə müqayisədə 2021-ci ildə 1% və ya 928 min manat azalaraq  93 milyon 560 min manat təşkil edib. Bank 2020-ci ilin sonunda 94 milyon 489 min manat cəmi depozitlərə malik idi.

MƏCMU KAPİTALI ARTIB

31 dekabr 2021-ci il tarixində“Günay Bank” 65 milyon 374 min manat məcmu kapitala malik olub. Bank 31 dekabr 2020-ci il tarixində 64 milyon 847 min manat məcmu kapitala malik idi.