Rusiyanın Perm diyarı rəhbərliyi dəmir yolu ilə Azərbaycandan meyvə və tərəvəzin birbaşa sürətli çatdırılmasını təşkil etmək niyyətindədir.

Bu barədə “Kommersant”a istinadən xəbər verir.

Qeyd edilir ki, Permdə bu malların saxlanılacağı logistika mərkəzinin tikilməsi də nəzərdə tutulub. Onun yeri və layihə üçün potensial investorlar hələ müəyyən edilməyib. Mütəxəssislər mərkəzin tikintisinə yatırılan investisiyaların həcmini qiymətləndirməkdə çətinlik çəkir, bunun nəzərdə tutulan tədarük həcmindən asılı olacağını izah edirlər.

Perm diyarının nümayəndə heyəti Azərbaycanın paytaxtı Bakıda işgüzar səfərdə olub, səfər zamanı tərəflər əməkdaşlıq imkanlarını müzakirə ediblər. Regional hökumətin mətbuat xidmətindən verilən məlumata görə, onun istiqamətlərindən biri “Aqroexpress” layihəsinin həyata keçirilməsi olacaq.

“Aqroexpress” “Rusiya Dəmir Yolları Logistika” Səhmdar Cəmiyyəti və “Rusiya İxrac Mərkəzi” ASC-nin ekspress konteyner qatarlarından istifadə etməklə kənd təsərrüfatı mallarının çatdırılması üzrə birgə xidmətidir. Layihəyə 2019-cu ildə start verilib. Onun ilkin məqsədi yerli ərzaq məhsullarını Çinə çatdırmaq idi. Layihə çərçivəsində bu gün Türkiyə və MDB ölkələrinə də mallar çatdırılır. Noyabrda Azərbaycan Rusiya ilə nəqliyyat və logistika dəhlizlərinin inkişafına dair strateji sənədlər imzalayaraq layihəyə qoşulub.

Rusiya Federasiyasının bir sıra subyektlərində Rusiya-Özbəkistan-Azərbaycan marşrutu üzrə malların həm daşınmasını, həm də qəbulunu formalaşdırmaq üçün sadələşdirilmiş gömrük və fitosanitar prosedurlara malik konteyner qovşaqları yaradılmalıdır. Perm ərazisi pilot ərazilərdən biri kimi müəyyən edilib.

İndi Prikamye rəhbərliyi Rusiya Dəmir Yolları ilə birlikdə potensial yüklərin siyahısını və həcmlərini formalaşdırır. Azərbaycana ağac emalı, maşınqayırma və kimya sənayesi məhsulları, gübrələr, plastik, qablaşdırma materialları və digər məhsullar ixrac oluna bilər. İlk növbədə, tərəvəz və meyvələrin idxalı nəzərdə tutulur.

Layihənin həyata keçirilməsində regional tərəfdaş kimi Perm Diyarının İnkişafı Fondu müəyyən edilib. Fondun baş direktoru Aleksey Burakov öz instaqram səhifəsində layihə çərçivəsində həmçinin Permdə meyvə və tərəvəzlərin saxlanması üçün logistika mərkəzinin tikintisini planlaşdırdığını bildirib. Onun sözlərinə görə, Bakıya səfər zamanı obyektin yerləşəcəyi əraziyə dair tələblər müzakirə olunub.

Telegramda Marja.az səhifəsinə abunə olun

“Report”