Metal məmulatlarının istehsalı ilə məşğul olan “EKSPRESS-C” ASC hər birinin nominal dəyəri 1000 manat olan 4 000 ədəd faizli, təminatsız, sənədsiz, adlı istiqrazlar buraxır. Şirkət investorlardan 4 milyon manat cəlb etdmək niyyətindədir.

Marja.az xəbər verir ki, şirkətin ilk 2 milyon manatlıq itiqrazlarının yerləşdirilməsi 2 dekabr 2021-ci il tarixində Bakı Fond Birjasında birqiymətli hərrac üsulu ilə həyata keçiriləcəkdir. Digər buraxılışların yerləşdirilməsi hər biri 1 milyon manatlıq olmaqla təşkil ediləcəkdir.

İstiqrazlar üzrə illik faiz dərəcəsi 12,5%-dir. Tədavül müddəti 2 il olan istiqrazlar üzrə kupon faizləri 3 aydan bir ödəniləcəkdir.

İstiqraz təklifinin səbəbi istehsal həcminin artırılması ilə mənfəətin əldə edilməsidir. Məlum olduğu kimi qeyri neft sektorunun inkişafı prioritet istiqamətlərdən biridir. Bu məqsədlə ixracyönümlü məhsulların hazırlanması, habelə daxili bazarda tələbin qarşılanması məqsədi ilə şirkət öz fəaliyyətini genişləndirmək məqsədini daşıyır.

“EKSPRESS-C” ASC 2020-ci ili 30 min 641 manat xalis zərər ilə başa vurub. Halbuki, şirkət 2019-cu ili 56 min 712 manat xalis mənfəət ilə bağlamışdı. Şirkət 2021-ci ilin 10 ayını isə 85 min 76 manat xalis mənfəət ilə yekunlaşdırıb. 

2020-ci ilin sonunda “EKSPRESS-C” ASC-nin cəmi aktivləri 1 milyon 145 min 693 manat, cəmi öhdəlikləri 1 milyon 84 min 531 manat, cəmi kapitalı isə 61 min 162 manat təşkil edib. 

Maliyyə vəsaiti cəlb etmək üçün yenidən təşkil olunmuş və 2021-ci ildən etibarən Açıq Səhmdar Cəmiyyəti kimi fəaliyyət göstərən “EKSPRESS-C” ASC-nin nizamnamə kapitalının 96.22 %-i İsmayılov Camaləddin Nurəddin oğluna, 3.78%-i Hüseynov Ömər Sahib oğluna məxsusdur. 

“EKSPRESS-C” ASC-nin nizamnamə kapitalı yenidən təşkil nəticəsində 8 milyon 354 min 900  manat məbləğinə çatdırılıb.

“Ekspress-C” ASC-nin zavodu Qobustan rayonu, Navahi qəsəbəsində yerləşir.