Türkiyə Cümhuriyyəti Mərkəzi Bankı (TCMB) faiz qərarını açıqladı.

Marja.az xəbər verir ki, gözlənildiyi kimi TCMB əsas pul siyasəti faizni 1 faiz bəndi aşağı salaraq 16%-dən 15%-ə endirib.

Türkiyə Prezidenti Rəcəb Tayyib Ərdoğan "faizin səbəb, inflyasiyanın nəticə olduğu" barədə fikirini müdafiə edir və son 20 ayda bu fikirə qarşı çıxan 3 TCMB sədrini işdən qovub.

Hazırkı TCMB sədri Şahap Kavcıoğlunun Ərdoğanın təzyiqi ilə faizi aşağı saldığı bildirilir. Son 3 ayda TCMB əsas faizini 19%-dən 15%-dək endirib.

Qərardan sonra Türk Lirəsi yenidən dəyərdən düşməyə başlayıb. Bu gün 10,9680 səviyyəsini görən, sonra 10,46 səviyyəsindək düşən  Dollar/TL məzənnəsi qərar açıqlandıqdan sonra 3% artaraq 10,97 səviyyələrinə qalxıb (saat 15:30-a olan məlumat)

Mərkəzi Bank qərar mətnində dekabr ayında da faizi aşağı sala biləcəyinə işarə edib. "Pul Siyasəti Şurası faizin azaldılması üzrə bu il üçün məhdud sahənin istifadəsini dekabr ayında tamamlamağı qiymətləndirəcək", - mətndə bildirilir.

"İnflyasiyada son dövrdə müşahidə edilən yüksəlişə - qida və başda enerji olmaqla idxalat qiymətlərindəki artımlar ilə tədarük müddətlərindəki axsaqlıqlar kimi təklif istiqamətli ünsürlər, tənzimlənən qiymətlərdəki artımlar və tələbin artması səbəb olmaqdadır. Pul siyasətinin yenilənməsinin (faizin aşağı salınmasının)  biznes kreditləri üzərində müsbət təsirləri görülməyə başlamışdır. Bununla yanaşı fərdi kreditlərlə əlaqədar proselər yaxından izlənilməkdədir. Şura, pul siyasətinin təsir edə bildiyi tələb ünsürləri, baza inflyasiya və təklif şoklarının yaratdığı təsirlərin təhlil edilməsinə dair analizləri qiymətləndirərək əsas pul siyasəti faizinin 1 bənd endirilərək 15% olaraq təyin olunmasına qərar vermişdir. Pul Siyasəti Şurası təklif istiqamətli və pul siyasətinin təsir sahəsinin xaricindəki faktorların qiymət artımları üzərində meydana gətirdiyi müvəqqəti təsirlərin 2022-ci ilin ilk yarısı ərzində də təsirini davam etdirməsini gözləməkdədir. Şura, bu təsirlərin eyham etdiyi məhdud sahənin istifadəsini dekabr ayında tamamlamağı qiymətləndirəcək",- Bankın yaydığı açıqlamada bildirilir.

Qeyd edək ki, Türkiyə hökuməti iqtisadi artım istiqamətli pul siyasətinə üstünlük verir. Hesab olunur ki, Türk Lirəsinin ucuzlaşdırılması ilə ixrac artırılacaq və cari kəsir ortadan qaldırılacaqdır.