Bu ilin yanvar-avqust aylarında (8 ayda) Azərbaycanda həyat sığortası üzrə 260 milyon 931 min manat sığorta haqqı toplanılıb.

Azərbaycan Mərkəzi Bankının aylıq statistikasına görə, bu, ötən ilin eyni dövrü ilə müqayisədə 21% çoxdur.

Hesabat dövründə həyat sığortası üzrə ödənişlərin məbləği isə 192 milyon 775 min manat təşkil edib. Bu isə illik müqayisədə 17,8% çoxdur.

Yanvar-avqust aylarında həyat sığortası üzrə toplanmış hər 100 manat sığorta haqqının 73,9 manatı ödəniş edilib. Ötən ilin eyni dövründə bu göstərici 75,9 manat olub.

Qeyri-həyat sığortası bazarı 2 % böyüyüb

Bu ilin yanvar-avqust aylarında Azərbaycanda qeyri-həyat sığortası üzrə 319 milyon 666 min manat sığorta haqqı toplanılıb. Bu, ötən ilin eyni dövrü ilə müqayisədə 2,1% çoxdur.

Hesabat dövründə qeyri-həyat sığortası üzrə ödənişlərin məbləği isə 14 milyon 91 min manat təşkil edib. Bu isə illik müqayisədə 48% çoxdur.

Yanvar-avqust aylarında qeyri-həyat sığortası üzrə toplanmış hər 100 manat sığorta haqqının 46 manatı ödəniş edilib. Ötən ilin eyni dövründə bu göstərici 31,7 manat olub.

İcbari sığorta bazarı 12 % böyüyüb

Bu ilin yanvar-avqust aylarında Azərbaycanda icbari sığorta üzrə ümumilikdə 181 milyon 767 min manat sığorta haqqı toplanılıb. Bu, ötən ilin eyni dövrü ilə müqayisədə 11,65% çoxdur.

Hesabat dövründə icbari sığorta üzrə ödənişlərin məbləği isə 82 milyon 122 min manat təşkil edib. Bu isə illik müqayisədə 87 % çoxdur.

Yanvar-avqust aylarında icbari sığorta üzrə toplanmış hər 100 manat sığorta haqqının 45,1 manatı ödəniş edilib. Ötən ilin eyni dövründə bu göstərici 27 manat olub.

Könüllü sığorta bazarı 9 % artıb

Bu ilin yanvar-avqust aylarında Azərbaycanda könüllü sığorta üzrə ümumilikdə 398 milyon 830 min manat sığorta haqqı toplanıb. Bu, ötən ilin eyni dövrü ilə müqayisədə 9 % çoxdur.

Hesabat dövründə könüllü sığorta üzrə ödənişlərin məbləği isə 257 milyon 744 min manat təşkil edib. Bu isə illik müqayisədə 17,6% çoxdur.

Yanvar-avqust aylarında könüllü sığorta üzrə toplanmış hər 100 manat sığorta haqqının 64,7 manatı ödəniş edilib. Ötən ilin eyni dövründə bu göstərici 59,9 manat olub.

Xəbər verdiymiz kimi, Bu ilin yanvar-avqust aylarında Azərbaycandakı 20 sığorta şirkətinin xətti ilə 580 milyon 597 min manat məbləğində sığorta haqqı toplanılıb. Bu, ötən ilin eyni dövrü ilə müqayisədə 9,8% çoxdur. Hesabat dövründə sığorta şirkətlərinin həyata keçirdikləri ödənişlərin məbləği isə 339 milyon 866 min manat təşkil edib. Bu isə illik müqayisədə 29,2% çoxdur.

Telegramda Marja.az səhifəsinə abunə olun

"Report"